Musa aaikarire Midiani mĩaka 40. Nĩ aahikanirie na akĩgĩa ciana. Mũthenya ũmwe rĩrĩa aarĩithagia ng’ondu ciake hakuhĩ na Kĩrĩma gĩa Sinai, nĩ onire ũndũ wa kũgegania. Haarĩ kĩhinga gĩakanaga, no gĩtiahĩaga! Rĩrĩa Musa aakuhagĩrĩria kĩhinga kĩu nĩguo one nĩ kĩĩ gĩatũmaga kĩage kũhĩa, nĩ aaiguire mũgambo woima ho ũkiuga: ‘Musa! Ndũgakuhĩrĩrie haha. Ruta iratũ, tondũ handũ haha ũrũgamĩte nĩ hatheru.’ Nĩ Jehova wamwaragĩria kũgerera mũraika.

Musa nĩ aaiguire guoya mũno na akĩhitha ũthiũ wake. Thutha ũcio aaiguire mũgambo woiga ũũ: ‘Nĩ nyonete ũrĩa Aisiraeli maranyamarĩka. Nĩ ngũmahonokia kuuma kũrĩ Amisiri na ndĩmatware bũrũri mwega. Na wee nĩwe ũkũruta andũ akwa bũrũri wa Misiri.’ Na githĩ to mũhaka akorũo ũndũ ũcio nĩ wagegirie Musa mũno?

Musa oririe ũũ: ‘Nguuga atĩa andũ manjũria nũ ũndũmĩte?’ Nake Ngai akĩmũcokeria: ‘Thiĩ ũmeere atĩ Jehova, Ngai wa Iburahimu, Ngai wa Isaaka, na Ngai wa Jakubu nĩwe ũgũtũmĩte.’ Musa aacokire akĩmũria: ‘Ĩ mangĩrega gũũthikĩrĩria?’ Jehova nĩ aamuonirie maũndũ ma gũtũma etĩkie na ma biũ atĩ nĩ angĩamũteithirie. Eerire Musa arekie rũthanju rwake thĩ na rũthanju rũu rũgĩtuĩka nyoka. Rĩrĩa Musa aanyitire mũting’oe wa nyoka ĩyo, yacenjirie ĩgĩtuĩka rũthanju rĩngĩ. Jehova aamwĩrire ũũ: ‘Weka ũguo, ũndũ ũcio nĩ ũkuonania atĩ nĩ niĩ ngũtũmĩte.’

Musa aamwĩrire ũũ: ‘Ndirĩ mwaria mwega.’ Nake Jehova akĩmwĩra: ‘Nĩ ngũkwĩra ũrĩa ũkuuga na nĩ ngũtũma mũrũ wa nyũkwa Haruni nĩguo agũteithie.’ Tondũ gũkinyĩria hĩndĩ ĩyo Musa nĩ aamenyaga atĩ Jehova aarĩ hamwe nake, nĩ oire mũtumia na ciana ciake na magĩcoka Misiri.