មេរៀនទី១៨
ភ្លើងឆេះក្នុងគុម្ពបន្លា
ម៉ូសេរស់នៅស្រុកម៉ាឌានអស់៤០ឆ្នាំ។ គាត់បានរៀបការ ហើយមានកូន។ ថ្ងៃមួយ ពេលម៉ូសេកំពុងឃ្វាលចៀមនៅក្បែរភ្នំស៊ីណាយ គាត់បានឃើញរឿងដ៏អស្ចារ្យមួយ គឺឃើញអណ្ដាតភ្លើងឆេះក្នុងគុម្ពបន្លា តែគុម្ពបន្លាមិនឆេះទេ! ហេតុនេះ ម៉ូសេក៏ចូលទៅជិត ដើម្បីដឹងថាមានអ្វីកើតឡើង ស្រាប់តែគាត់ឮសំឡេងមួយចេញពីគុម្ពបន្លាថា៖ ‹ម៉ូសេ! កុំចូលមកជិតទៀត។ ចូរដោះស្បែកជើងអ្នកចេញ ព្រោះកន្លែងដែលអ្នកកំពុងឈរនេះ គឺជាដីបរិសុទ្ធ›។ នេះជាសំឡេងរបស់ព្រះយេហូវ៉ា ដែលកំពុងមានប្រសាសន៍តាមរយៈទេវតាមួយរូប។
ពេលឮសំឡេងនោះ ម៉ូសេភ័យណាស់ ដូច្នេះគាត់ក៏បាំងមុខ។ ព្រះយេហូវ៉ាមានប្រសាសន៍ទៀតថា៖ ‹ខ្ញុំបានឃើញទុក្ខវេទនារបស់ជនជាតិអ៊ីស្រាអែល។ ខ្ញុំនឹងសង្គ្រោះពួកគេឲ្យរួចពីកណ្ដាប់ដៃរបស់ពួកអេហ្ស៊ីប ហើយនាំពួកគេទៅស្រុកដ៏ល្អ។ អ្នកគឺជាបុគ្គលដែលខ្ញុំនឹងប្រើ ដើម្បីដឹកនាំរាស្ដ្ររបស់ខ្ញុំចេញពីស្រុកអេហ្ស៊ីប›។ នេះច្បាស់ជាធ្វើឲ្យម៉ូសេភ្ញាក់ផ្អើលណាស់ មែនទេ?
ម៉ូសេសួរថា៖ ‹តើខ្ញុំគួរឆ្លើយយ៉ាងណា បើបណ្ដាជនសួរថាអ្នកណាចាត់ខ្ញុំឲ្យមក?›។ ព្រះតបថា៖ ‹ចូរប្រាប់ពួកគេថា ព្រះយេហូវ៉ាជាព្រះនៃអាប្រាហាំ ព្រះនៃអ៊ីសាក និងព្រះនៃយ៉ាកុប បានចាត់ខ្ញុំឲ្យមកឯអ្នករាល់គ្នា›។ ម៉ូសេក៏សួរទៀតថា៖ ‹ចុះបើបណ្ដាជនមិនជឿខ្ញុំ?›។ ព្រះយេហូវ៉ាបានបង្ហាញម៉ូសេថា លោកនឹងជួយគាត់។ លោកបានប្រាប់គាត់ឲ្យបោះដំបងទៅលើដី។ ពេលគាត់ធ្វើតាម ដំបងនោះបានប្រែទៅជាសត្វពស់! ពេលគាត់លូកដៃចាប់កាន់កន្ទុយពស់ នោះវាក៏ប្រែទៅជាដំបងវិញ។ ព្រះយេហូវ៉ាមានប្រសាសន៍ថា៖ ‹ពេលអ្នកធ្វើការអស្ចារ្យដូចនេះ ពួកគេនឹងជឿថាខ្ញុំបានចាត់អ្នកឲ្យមក›។
ប៉ុន្តែ ម៉ូសេបន្តប្រាប់ថា៖ ‹ខ្ញុំមិនពូកែនិយាយទេ›។ ព្រះយេហូវ៉ាសន្យាថា៖ ‹ខ្ញុំនឹងប្រាប់អ្នកនូវអ្វីដែលអ្នកត្រូវនិយាយ ហើយខ្ញុំនឹងចាត់អេរ៉ុនបងប្រុសរបស់អ្នកឲ្យជួយអ្នក›។ ពេលម៉ូសេដឹងច្បាស់ថា ព្រះយេហូវ៉ានៅជាមួយនឹងគាត់ នោះគាត់បាននាំប្រពន្ធនិងកូនៗធ្វើដំណើរត្រឡប់ទៅស្រុកអេហ្ស៊ីបវិញ។
«កុំខ្វល់ចិត្តថាអ្នកត្រូវនិយាយអ្វីឬនិយាយយ៉ាងណាឡើយ ពីព្រោះអ្នកនឹងដឹងនូវអ្វីៗដែលត្រូវនិយាយនៅវេលានោះឯង»។—ម៉ាថាយ ១០:១៩