Wɔsilaŋ 40 Muuse chii o lɛŋnde Midiaŋndeŋ niŋ ni. Loŋ o chua lanɔɔ ni, nduyɛ mbo vialu chuauwa. Paale pilɛ, mɛɛ o kuɛ saa o wa mandaa wa tofaa o Pembii Sainaive ikɛi, mbo cha nyɛ pum mi kɔndɔfillo bii ndu. Mbo cha yiŋndeŋ biyɔɔ o bɔɔ niŋ, kɛ bɔɔ ve ŋɔ le. Mɛɛ Muuse sɔɔŋguu bɔɔ ikɛi le chɔɔ nyɛ wa yɔŋnɔŋndo wo, mbo tuɛi diomndo o bɔɔ koŋ niŋ aa: ‘Muuse, sɔɔŋguu ikɛi loŋ te. Soli kɔwɛila cho num o ŋpelu laŋ, kanifuule o fondaŋ diandaa ŋ sim koŋ ni.’ Chɛhowa soliŋ maalikɛinɔɔ kpeku ni mbo wa suɛi naa Muuse chua.

Mi siooŋnde bii Muuse. Okoŋ mbo kumbu hɔlla. Mbo tuɛi diomndo aa: ‘I cho chɔɔ mɛɛ waŋnda Isɔluɛi cho saŋgaa yɛ. Nduyɛ I cho nda chiindiaa waŋnda Ichipi o ba, mi hiŋ a nda o lɛŋnde kɛndɛleŋ niŋ. Num cho waŋnda Isɔluɛi isisi lachi ni, le nda solioo Ichipi.’ A yiyaŋ nuaa maa mi kɔndɔfillo bii Muuse a hei okɔɔ le?

Mi Muuse nyuna aa: ‘Te waŋnda nyuna pɛ aa nɛɛ vem yɛ ya, yɛɛnɛ ya dimullɛ nda?’ Mi Mɛlɛka mulul ndu aa: ‘Dimul nda maa Chɛhowa, Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo vem ya naa nya chua ni.’ Mi Muuse nyuna vɛlɛ aa: ‘Te o wa yɛ mi waŋnda yeŋ ya lani le?’ Mi Chɛhowa tosa nyɛ le Muuse chɔmndo maa o cho ndu mala. Mbo dimul ndu maa o mal tinda wa ndu o ba wo lɛŋ. Mɛɛ o mal tindaa, mbo simnuŋ kɛuwo! Mɛɛ Muuse saa kɛu koŋ puiileŋ, mbo simnuŋ vɛlɛ tindaa. Mi Chɛhowa dimul Muuse aa: ‘Te a tosa hei pɛ, waŋnda cho chɔ kɛsɛ maa ya vem num ni.’

Mi Muuse dimi aa: ‘I cho wana chaa isɔɔ le.’ Mi Chɛhowa dimul Muuse aa: ‘I cho num chɔm nyɛ ŋ nɔ le dimioo wo. Nduyɛ I cho Elɔŋ bɛ num viomɔɔ le mbo mala num.’ Mi Muuse sina kɛsɛ maa Chɛhowa wa a ndu latulu. Le hei, mbo chua laa ndɔ a chuauwaa nduaa, mbo miiŋgu Ichipi.