တၢ်မၤလိ ၁၈
မ့ၣ်အူအီၣ်သ့ၣ်တၤဆှုၣ်
စီၤမိၤၡ့အိၣ်ဝဲလၢ ကီၢ်မံးဒယၣ်အပူၤအနံၣ် ၄၀ လီၤ. စီၤမိၤၡ့န့ၢ်ဘၣ်အမါဖဲန့ၣ် ဒီးအဖိအိၣ်ဝဲလီၤ. ဘၣ်တနံၤန့ၣ် စီၤမိၤၡ့လဲၤကွၢ်သိလၢ အဘူးဒီးကစၢၢ်စံၤနါလီၤ. ဖဲန့ၣ်န့ၣ် စီၤမိၤၡ့ထံၣ်ဘၣ်ဝဲ တၢ်လီၤဆီ တမံၤလီၤ. မ့ၣ်အူအီၣ်ထီၣ်ဝဲသ့ၣ်တၤဆှုၣ်ဖိတခိၣ်လီၤ. ဘၣ်ဆၣ် သ့ၣ်တၤဆှုၣ်ဖိတခိၣ်အံၤ တအူအီၣ်ဒီးတကဲထီၣ်ဝဲဖၣ်ဆါဘၣ်. ဖဲစီၤမိၤၡ့လဲၤသုးဘူးအသးလၢ သ့ၣ်တၤဆှုၣ်ဖိတခိၣ်အံၤအကပၤအခါ အဝဲနၢ်ဟူဘၣ်ဝဲ တၢ်ကလုၢ်သီၣ်ထီၣ်လၢ– ‘စီၤမိၤၡ့ဧၢ, တဘၣ်ဟဲဘူးထီၣ်လၢၤတဂ့ၤ. ဘ့ၣ်လီၤကွံာ်နခီၣ်ဖံး မ့ၢ်လၢနဆၢထၢၣ်လၢ တၢ်လီၢ်စီဆှံအဖီခိၣ်အဃိလီၤ.’ ယဟိဝၤယွၤသူဝဲမူခိၣ်ကလူးလၢ ကတဲတၢ်ဒီးစီၤမိၤၡ့လီၤ.
စီၤမိၤၡ့ပျံၤတၢ်အဃိ အဝဲကးဘၢအမဲာ်သၣ်လီၤ. တၢ်ကလုၢ်တဲဘၣ်အီၤလၢ– ‘ယထံၣ်ဘၣ်ပှၤအံၣ်စရ့လးဖိတဖၣ် ဘၣ်နးဘၣ်ဖှီၣ်လီၤ. ယကမၤပူၤဖျဲးအဝဲသ့ၣ်လၢ ပှၤအဲၤကူပတူးဖိတဖၣ်အစုပူၤ ဒီးယကဒုးလဲၤပှၤအံၣ်စရ့လးဖိလၢ ကီၢ်လၢအဂ့ၤတဘ့ၣ်လီၤ. ဒီးနကမ့ၢ်ပှၤတဂၤလၢ ကထုးထီၣ်ကွံာ် ယပှၤဂီၢ်မုၢ်လၢ ကီၢ်အဲၤကူပတူးအပူၤလီၤ.’ ကစၢ်ယွၤတဲဘၣ်အီၤဒ်အံၤအဃိ စီၤမိၤၡ့ကဖုးဘၣ်အသးလီၤ.
စီၤမိၤၡ့သံကွၢ်ကစၢ်ယွၤလၢ– ‘ပှၤမ့ၢ်သံကွၢ်ယၤလၢ မတၤတဂၤဆှၢလီၤယၤလဲၣ်န့ၣ် ယကဘၣ်စံးဆၢက့ၤအဝဲသ့ၣ်ဒ်လဲၣ်.’ ကစၢ်ယွၤတဲဆၢက့ၤအီၤလၢ– ‘တဲဘၣ်အဝဲသ့ၣ်လၢ ယဟိဝၤယွၤလၢအမ့ၢ် စီၤအၤဘြၤဟၣ်အယွၤ, စီၤအံၤစဲးအယွၤ ဒီးစီၤယၤကိာ်အယွၤ ဆှၢလီၤနၤလီၤ.’ ဝံၤဒီး စီၤမိၤၡ့တဲဆၢက့ၤကစၢ်ယွၤလၢ– ‘ပှၤမ့ၢ်တဒိကနၣ်ယကလုၢ်န့ၣ် ယကဘၣ်မၤဒ်လဲၣ်.’ ယဟိဝၤယွၤမၤဝဲတၢ်လီၤလးတခါဒ်သိး ကကဲထီၣ်တၢ်မၤစၢၤလၢ စီၤမိၤၡ့အဂီၢ်လီၤ. ယဟိဝၤယွၤမၢစီၤမိၤၡ့ တၢၤလီၤအနီၣ်ထိးဘိလၢ ဟီၣ်ခိၣ်လိၤလီၤ. ဝံၤဒီး နီၣ်ထိးဘိကဲထီၣ်ဂုၢ်လီၤ. ဖဲစီၤမိၤၡ့ဖီၣ်ဝဲဂုၢ်အခံမဲၢ်အခါ ဂုၢ်အံၤကဲထီၣ်က့ၤနီၣ်ထိးဘိလီၤ. ယဟိဝၤယွၤတဲဘၣ်စီၤမိၤၡ့လၢ– ‘ဖဲနမၤတၢ်လီၤလးအံၤအခါ ပှၤကသ့ၣ်ညါလၢယမၢလီၤနၤလီၤ.’
စီၤမိၤၡ့တဲဘၣ်ကစၢ်ယွၤလၢ– ‘ယတဲတၢ်တသ့ဘၣ်.’ ယဟိဝၤယွၤအၢၣ်လီၤအီၤလၢ– ‘ယကတဲဘၣ်နၤတၢ်လၢ နကဘၣ်တဲတဖၣ်လီၤ. ဒီးယကမၢ နဒီပုၢ်ဝဲၢ်ခွါစီၤအၤဟရိၣ် မၤစၢၤနၤလီၤ.’ စီၤမိၤၡ့သ့ၣ်ညါဝဲလၢ ယဟိဝၤယွၤအိၣ်ဒီးအီၤအဃိ အဝဲကိးထီၣ်အမါဒီးအဖိခွါတဖၣ် ဒီးက့ၤကဒါက့ၤဆူ ကီၢ်အဲၤကူပတူးအပူၤလီၤ.
“မ့ၢ်သုကကတိၤတၢ် ဒ်လဲၣ်မ့ၢ်ဂ့ၤ, မနုၤမနုၤလဲၣ်မ့ၢ်ဂ့ၤ, သုတဘၣ်ယိၣ်တဂ့ၤ. အဂ့ၢ်ဒ်အံၤ, တၢ်ကဟ့ၣ်လီၤ သုလၢတၢ်လၢ သုကကတိၤတၢ်န့ၣ် တစုဃီဖဲန့ၣ်လီၤ.”—မးသဲ ၁၀:၁၉
