Mose mvu 40 kazingila kuna Midiani. Wasompa yo wuta wana. Lumbu kimosi, vava kavungulanga mameme mandi lukufi yo Mongo a Sinai, diambu diasivi kamona. Nti walemanga yo tiya, kansi ke wabomokanga ko. Vava Mose kafinama vana ndambu mu zaya e kuma, wawá ndinga yatuka vana kati kwa nti yavova vo: ‘Mose! Kufinami va ndambu ko. Katula nsampatu muna malu kadi e fulu kiaki otelamene fulu kiavauka.’ Yave wamokenanga yo Mose muna nzil’a mbasi.

Mose wonga kikilu kamona. Muna kuma kiaki, wafukila lose lwandi. E ndinga yayi yavova vo: ‘Mbwene mpasi za Aneyisaele. Ikubavuluza muna Engipito yo kubanata mu nsi yambote. Ngeye ovaikisa nkangu ame muna Engipito.’ E diambu diadi diasivikisa kikilu Mose, ke wau ko?

Mose wayuvula vo: ‘Adieyi ivova vava bekungiuvula vo nana untumini?’ Nzambi wamvovesa vo: ‘Ubavovesa vo Yave wa Nzambi a Abarayama, wa Nzambi a Isaki, wa Nzambi a Yakobo, untumini kwa yeno.’ I bosi, Mose wavova vo: ‘Avo ke bankwikidi ko, adieyi ivanga?’ Yave wavanga diambu diakwikidisa Mose vo okunsadisa. Yave wavovesa Mose vo katuba nkau andi vana ntoto. I bosi, o nkau wakituka nioka. Vava Mose kasimba e nioka muna nkila, nioka yakituka diaka se nkau. Yave wavova vo: ‘Vava ovanga e sivi diadi, dikubakwikidisa vo mono itumini.’

Mose wavova vo: ‘Kizeye toma vova ko.’ Yave wansia nsilu vo: ‘Ikuzayisa mana ovova yo kufidila mpangi aku Arone mu kusadisa.’ Wau kazaya vo Yave una yandi, Mose wabaka nkento yo wan’andi mu kwenda kuna Engipito.