Moˉseˍ Meˇdiˍanˍ mvuhˇ miˬ lo 40 hkʼawꞈ chehˇ ve yoˬ. Yawˇ oˇ kaˬ lo awˬ miˇ ma heuˆ leh yaˇ cawˬ ve yoˬ. Siˉnaˆ hkʼaw paˇ lo Moˉseˍ yawˬ hawˉ chehˇ ve teˇ nyi htaˇ, anˇ tuˬ teˇ ceuˬ htaꞈ gʼa mawˬ ve yoˬ. Suhˆ buiˇ teˇ buiˇ aˬ miˍ toꞈ chehˇ ve htawˇ, maˇ toꞈ baˬ! Moˉseˍ ca nyi ve teˇ yanˇ, suhˆ buiˇ hkʼaw awˬ hkawˇ bvuhˬ tawˆ la ve htaꞈ gʼa kaˇ ve, ‘Moˉseˍ˗oˬ! Awˬ paˇ neˇ lo taˇ laˬ. Nawˬ ve hkuiˉ nuˆ kʼehˆ˗oˆ. Awˬ lawn kʼo, nawˬ huˉ taˍ kuiˬ daꞈ kehˬ ve chehˇ kuiˬ hpehꞈ ve yoˬ.’ Yaˬhoˉvaˬ mvuhˇ naw ma tcuh yaˇ htaꞈ cuˇ leh Moˉseˍ htaꞈ tawˇ yaw piˇ ve yoˬ.

Moˉseˍ kawˆ leh mehˆ hpfuhˇ htaꞈ beh taˍ ve yoˬ. Awˬ hkawˇ oˇ ve kʼawꞈ kʼoˆ ve, ‘Iˉsaˍreˍlaˆ chaw hkʼaˬ ma gʼa tuꞈ hkanˍ chehˇ ve htaꞈ ngaˬ gʼa mawˬ peuˬ. Ngaˬ yawˇ hui htaꞈ Eˇjiˇtuꞈ mvuhˇ miˬ hkʼaw shiˍ tawˆ la piˇ leh daꞈ jaˇ ve mvuhˇ miˬ lo shiˍ kʼai piˇ tuˬ yoˬ. Nawˬ ngaˬ ve chaw ceuˬ htaꞈ Eˇjiˇtuꞈ mvuhˇ miˬ hkʼaw gʼa shiˍ tawˆ la piˇ tuˬ yoˬ.’ Moˉseˍ chi hkʼe gʼa kaˇ htaˇ, yawˇ anˇ jaˇ ve yoˬ.

Moˉseˍ kʼoˆ ve, ‘nawˬ htaꞈ a shu peu laˇ ve le tehꞈ yawˇ hui na laˇ ve kʼo, ngaˬ hkʼaˬ hkʼe kʼoˆ piˇ tuˬ le?’ Gʼuiˬ sha kʼoˆ ve, ‘Aˍbraˍhanˍ, Iˉcaˆ, Yaˍkoˆ hui ve Gʼuiˬ sha ngaˬ htaꞈ peu laˇ ve tehꞈ yawˇ hui htaꞈ kʼoˆ piˇ˗oˆ.’ Moˉseˍ kʼawꞈ kʼoˆ ve, ‘yawˇ hui ngaˬ ve hkawˇ maˇ na ve kʼo, hkʼaˬ hkʼe te tuˬ le?’ Yaˬhoˉvaˬ Moˉseˍ htaꞈ ga piˇ tuˬ awˬ heˆ te maˍ piˇ ve yoˬ. Yawˇ Moˉseˍ juˇ fuiˍ taˬ miˬ chaˇ hkʼoˆ lo baˬ peu tcuh leh juˇ fuiˍ taˬ oˇ ve vuiˬ hpehꞈ la ve yoˬ! Moˉseˍ vuiˬ mehˍ tu htaꞈ yuˬ ve teˇ yanˇ, juˇ fuiˍ taˬ kʼawꞈ hpehꞈ la ve yoˬ. Yaˬhoˉvaˬ kʼoˆ ve, ‘nawˬ chi hkʼe te ve kʼo, ngaˬ nawˬ htaꞈ peu laˇ ve yoˬ tehꞈ yawˇ hui yonˍ tuˬ yoˬ.’

Moˉseˍ kʼoˆ ve, ‘ngaˬ tawˇ yaw puiˉ ve chaw hpehꞈ ve maˇ heˆ.’ Yaˬhoˉvaˬ yawˇ htaꞈ ka tiꞈ kʼawꞈ te piˇ ve, ‘nawˬ hkʼaˬ hkʼe gʼa kʼoˆ tuˬ ngaˬ nawˬ htaꞈ hto laˇ leh nawˬ viˉ paˍ Aˍronˍ nawˬ htaꞈ ga laˇ tcuh tuˬ yoˬ.’ Moˉseˍ yawˇ geh Yaˬhoˉvaˬ chehˇ ve tehꞈ shiˍ ve teˇ yanˇ, awˬ miˇ ma leh awˬ yaˇ htaꞈ shiˍ veu leh Eˇjiˇtuꞈ mvuhˇ miˬ lo kʼoꞈ˗e ve yoˬ.