Pandan 40 an, Moiz ti viv dan Madian. Li ti marye ek li ti ena bann zanfan. Enn zour, kan li ti pe okip so bann mouton pre ar Montagn Sinai, li ti trouv enn kitsoz extraordiner. Enn ti pie pikan ti pe pran dife, me li pa ti pe brile! Kan Moiz ti al pre ar sa pie-la pou esey konpran kifer li pa ti pe brile, li ti tann enn lavwa depi pie-la dir: ‘Moiz! Pa koste pli pre. Tir to sandalet parski plas kot to pe debout li sakre.’ Se Zeova ki ti pe koze gras-a enn anz.

Moiz ti gagn per. Alor, li ti kouver so figir. Lavwa-la ti dir li: ‘Mo finn trouv soufrans bann Izraelit dan Lezip. Mo pou sap zot ek mo pou amenn zot dan enn bon pei. Se twa ki pou fer mo pep sorti depi Lezip.’ Dapre twa, kouma Moiz ti reazir? Sirman li ti gagn sok!

Moiz ti demann Zeova: ‘Kan zot pou demande kisannla ki’nn avoy mwa, ki mo pou bizin dir zot?’ Bondie ti reponn: ‘Dir zot ki se Zeova, Bondie Abraam, Bondie Izaak ek Bondie Zakob ki finn avoy twa.’ Lerla Moiz ti demande: ‘Me si zot pa ekout mwa?’ Zeova ti montre Moiz ki Li ti pou ed li. Li ti dir Moiz zet so baton anba. Lerla, sa baton-la ti vinn enn serpan! Kan Moiz ti trap sa serpan-la par so lake, li ti revinn enn baton. Lerla, Zeova ti dir Moiz: ‘Kan to pou montre zot sa sign-la, zot pou kone ki se mwa ki finn avoy twa.’

Apre sa, Moiz ti dir: ‘Mo pena kapasite pou koz bien.’ Zeova ti promet li: ‘Mo pou dir twa seki to bizin dir, ek mo pou avoy to frer Aaron pou ed twa.’ Moiz ti sir ki Zeova ti pou avek li. Alor, li ti pran so madam ek so bann garson, ek zot ti retourn Lezip.