Mose wikazile umu Midyani pa myaka 40. Watwazile, akwata na ana. Wanda umwi lino wacemanga imfwele zyakwe umupiipi nu mwamba wa Sinai, waweni icintu cimwi icamuzungwisye. Waweni icimpuza ica myunga cikwaka umoto, nomba citapyanga! Lino Mose wapalamiile kuti alole icikucitika, uvwile izwi ukufuma umu cimpuza likuti: ‘Mose! utapalama apiipi. Zula indyatu zyako pano icifulo cino uwimililepo i ca muzilo.’ Yeova u walandanga ukupitila muli malaika wakwe.

Mose uvwile intete, fwandi waivimvile pa manso. Uvwile izwi likuti: ‘Iindola vino Aina Izlaeli yakucula. Ndayapususya uku Ina Ijipti nu kuyatwala uku mpanga isuma. Wewe ulatungulula antu yane ukufuma umu Ijipti.’ Uzye ukwelenganya ukuti Mose wazungwike?

Mose uzizye ati: ‘Uzye ndalanda uli nga yanguzya yati, “A weni uwatakutuma?”’ Leza waswike ati: ‘Ukayanene ukuti uwatantuma a Yeova, Leza wakwe Abulahamu, Leza wakwe Isaki, nupya Leza wakwe Yakobo.’ Lyene Mose watiile: ‘Nga ndi cakuti yaaya yakana ukuvwa?’ Yeova wacisile vimwi ivyalangilile ukuti wali nu kwazwa Mose. Wanenyile Mose ukuti asumbe intuwa yakwe pansi. Lyene intuwa iyo yasangwike inzoka. Lino Mose walemile umusinda wa nzoka, yasangwike intuwa nupya. Yeova walanzile ukuti: ‘Nga waya wacita vii, yalamanya ukuti a nene inkutuma.’

Mose watiile: ‘Nemo ntamanya ukuvwanga ningo.’ Lyene Yeova wamulavile ati: ‘Ndakuneena ivyakulanda, nupya ndatuma Aloni umwina wako kuti akakwazwe.’ Lino Mose wamanyile ukuti Yeova wali nawe, wene nu muci wakwe na ana yakatwike ukuya uku Ijipti.