Moisés mokajki ipan Madián 40 xiuitl. Nopaya mosiuajtik uan kinpixki ikoneuaj. Se tonali, kema kinmokuitlauiyaya iborregojuaj nechka tepetl Sinaí, kiitak se tlamantli tlen amo kema kiitstoya. Kiitak se xiuitsontli lementoya, ¡uan amo tlatlayaya! Moisés monechkauik pampa kinekiyaya kiitas tlake panoyaya, uajka kikaktejki ipan xiuitsontli se akajya kinojnotsayaya, uan kiiljuik: “¡Moisés! Amo ximonechkaui. Xijkixti motekak pampa tlatsejtseloltik ni tlali kampa timoketstok”. Eliyaya Jehová, ya kitekiuik se iluikaejketl kema kinojnotski Moisés.

Moisés majmajki, yeka moixtsajki. Jehová kiiljuik: “Nikitstok kenijkatsa israeleuanij tlaijiyouiaj. Nikinmakixtis ininmako egiptoeuanij uan nikinuikas ipan se tlali tlen ueyi uan kuali. Nijneki ta xikinkixtiti notekipanojkauaj katli itstokej Egipto”. ¿Tlake timoiljuia kiyolmatki Moisés?

Moisés kitlajtlanilik: “¿Tlake nikiniljuis kema nechiljuisej ajkia nechtitlanki?”. ToTeotsij kinankilik: “Tikiniljuis mitstitlanki Jehová, ininTeotsij Abraham, Isaac uan Jacob”. Uan Moisés kiiljuik: “¿Uan tlaj amo nechneltokilisej?”. Uajka Jehová kinextilik ya kipaleuiskia. Kiiljuik ma kitlauiso ikuatopil, uan kema kitlauisok, ¡ikuatopil mokuepki se kouatl! Teipa, Moisés kiitskik ipan ikuitlapil nopa kouatl uan sampa mokuepki se kuatopili. Uajka Jehová kiiljuik: “Kema tijchiuas ni tlamantli, kiitasej na nimitstitlanki”.

Uan Moisés kiiljuik: “Na amo kuali nikamanalti ininixpa maseualmej”. Uajka Jehová kiiljuik: “Na nimitsiljuis tlen monekis tikijtos, uan moikni Aarón mitspaleuis”. Kema Moisés kimatki Jehová kipaleuiskia, tlakuepilik Egipto iuaya isiua uan ikoneuaj.