Moisés nemik 40 xiujmej ompa Madián. Monamiktij uan kinpiak konemej. Se tonal keman kintakualtijtoya iichkauan kampa ika moajsia tepet Sinaí, kimoujkaitak se teisa tein mochiujtoya. Se kouit xotatoya, ¡sayoj ke amo tataya! Keman Moisés kiitato toni panotoya, kikakik se tajtol tein kisaya itech kouit uan kiluij: “¡Moisés! Amo ximotokiok. Ximokixtili motekakuan porin titaksatok itech tal tein chipauak”. Katka Jiova, akin kinojnotstoya Moisés itenkopa se ángel.

Moisés mouik, yejua ika moixtsakuak. Tajtol kiluij: “Nikitani ke israelitas semi tajyouijtokej. Nikinmakixtiti maj egipcios amo kintajyouiltikanok uan nikinuikati itech se kuali tal. Uan nikneki tejua xikixti noxolal itech altepet Egipto”. ¿Tiknemilia ke Moisés kimoujkakakik?

Moisés kitajtanij: “¿Toni moneki nikijtos keman nechtajtaniskej akoni nechtitanik?”. Dios kinankilij: “Xikinilui ke Jiova, iDios Abrahán, iDios Isaac uan iDios Jacob mitstitanik”. Moisés kijtoj: “¿Uan komo amo nechneltokiliaj?”. Jiova kichiuak se taman tein ika kimatiltij ke kipaleuiskia. Kiluij maj kitamotani itopil talpan, uan keman kitamotak, ¡topil mokepak se kouat! Ompa, Moisés kikitskij kouat ikuitapilko, uan oksepa mochiuak se topil. Ompa Jiova kiluij: “Keman tikchiuas nejin, tiknextis ke nejua nimitstitanik”.

Sayoj ke Moisés kijtoj: “Amo semi niueli nitajtoua sentaixpan”. Jiova motenkauak: “Nejua nimitsiluis toni moneki tikijtos, uan no, niktitaniti mokniuj Aarón maj mitspaleui”. Axkan ke Moisés kimatia ke Jiova kipaleuiskia, mokepak Egipto uan kiuikak inamik uan ikoneuan.