Moisés ochantik altepetl Madián 40 xiuitl. Ompa omonamikti uan okinpixki ikoneuan. Se tonal, okinmaluijtoka ichkauan ik tepetl Sinaí uan okitak itlaj tlen okitlajtlachialti. Se xiuitl oxotlatoka, ¡pero amo otlatlaya! Ijkuak Moisés okitato tlen opanotoka, okikak se tlajtoli tlen okisaya ijtik xiuitl uan okilui: “¡Moisés! Amo okachi ximotoki. Xikinmokixtili mokakuan, titlaksatok ipan tlali santo”. Jehová okitlapouijtoka Moisés ika se ángel.

Moisés omomojti, ik non, omoixtlapacho. Uan nin tlajtoli okiyekilui Moisés: “Yonikitak israelitas sapanoa tlajyouijtokej. Nikinmakixtis inmak egipcios uan nikinmakas se kuali tlali. Nikneki te xikinkixti itech Egipto”. ¿Tikneltoka Moisés omotlajtlachialti?

Moisés okitlajtlani: “¿Tlen nikijtos tla kinekij kimatiskej akin onechtitlanki?”. ToTajtsin Dios okinankili: “Xikinmilui Jehová, iDios Abrahán, iDios Isaac uan iDios Jacob omitstitlanki”. Moisés okijto: “¿Uan tla yejuan amo nechkakij?”. Jehová okichi se milagro para ma kineltoka ye kipaleuiskia. Okilui ma kitlamotla itlako uan ijkuak ijkon okichi, ¡itlako omokuepki se koatl! Satepan, Moisés okikitski koatl itech ikuitlapil uan oksepa omokuepki se tlakotl. Ijkuakon, Jehová okilui: “Ijkuak tikchiuas nin milagro, tikteititis ne onimitstitlanki”.

Pero Moisés okijto: “Amo kuali nitlajtoa inmixpan miakej”. Jehová okinankili: “Ne nimitsiluis tlen tikijtos uan niktitlanis mokni Aarón ma mitspaleui”. Ijkuak Moisés okimatki Jehová kipaleuiskia, omokuepki Egipto uan okiuikak isiua uan ikoneuan.