Moshe o dutše nageng ya Midiane mengwaga e 40. O ile a nyala mosadi gomme a ba le bana. Ka letšatši le lengwe ge a be a dišitše dinku kgauswi le Thaba ya Sinai, o ile a bona mohlolo. O ile a bona sehlare sa meetlwa se tuka mollo, eupša se sa swe! Ge Moshe a batamela gore a bone seo se diregago, o ile a kwa lentšu sehlareng seo le re: ‘Moshe! O se ke wa batamela mo. Rola dieta tša gago ka gobane lefelo leo o emego go lona ke le lekgethwa.’ Jehofa o be a bolela le Moshe a šomiša morongwa.

Moshe o be a tšhogile, ka gona a thiba sefahlego sa gagwe. Lentšu leo le ile la re: ‘Baisiraele ba a hlaka kua Egipita. Ke tlo ba phološa gomme ka ba iša nageng e botse. Ke wena o tlago go ba ntšha kua Egipita.’ Moshe o swanetše go ba a ile a tšhošwa ke seo, na ga go bjalo?

Moshe o ile a botšiša Jehofa a re: ‘Bjale ge ke fihla go Baisiraele, ke ba botše gore ke romilwe ke mang?’ Jehofa a re: ‘O ba botše gore o romilwe ke Jehofa, e lego Modimo wa Aborahama, Modimo wa Isaka le Modimo wa Jakobo.’ Ke moka Moshe a re go Jehofa: ‘Eupša ge ba sa ntheetše?’ Jehofa o ile a dira mohlolo go bontšha Moshe gore o tla mo thuša. O ile a botša Moshe gore a lahlele lepara la gagwe fase. Lepara leo le ile la fetoga noga! Ge Moshe a swara noga yeo ka mosela, e ile ya fetoga lepara gape. Ke moka Jehofa a re: ‘Ge o ka dira mohlolo wo pele ga Baisiraele, ba tla dumela gore o romilwe ke nna.’

Moshe a re: ‘Ga ke kgone go bolela gabotse.’ Eupša Jehofa a mo tshepiša a re: ‘Ke tla go botša seo o tlago go se bolela, e bile ke tla romela ngwana wa geno Arone gore a tle a go thuše.’ Ka ge gona bjale Moshe a be a tseba gore Jehofa o tla mo thuša, o ile a tšea mosadi wa gagwe le bana ba gagwe gomme a boela Egipita.