Mózes éí Mídiyandi kééhatʼı̨́įgo dízdiin nááhai. Azyeh áádóó haʼáłchíní hazlı̨́ı̨́ʼ. Dził Sáínaigi naʼniłkaadgo, haʼátʼíí shı̨́ı̨́ ayóó átʼéego jiiłtsą́. Dówózhii dookʼą́ą́ł, ndi doo adikʼą́ą́hgóó diltłiʼ! Haʼátʼíí lá biniyé doo adikʼą́ąh da jinízingo bíighahjįʼ nizhníyá, ńtʼééʼ dówózhii biiʼdę́ę́ʼ łaʼ hajoodzíiʼgo ájíní: ‘Mózes! Tʼáá ákweʼé sínízı̨́, nikeeʼ hadiidlé, háálá sínízínígi hodiyingo hazʼą́.’ Díí éí Jiihóvah bá naalʼaʼí łaʼ choyoosʼįįdgo hachʼįʼ haadzííʼ.

Mózes nídzísdzíidgo haniiʼ bichʼą́ą́h nizhdeelniiʼ. Áádóó hachʼįʼ haadzííʼ yę́ę ánáádíʼní: ‘Ízrel dineʼé tiʼdahooníihgo yiiłtsą́. Ííjip dineʼé bílákʼee hááhodeeshʼish áádóó kéyah yáʼáhootʼéehjįʼ chʼíhodeeshʼish. Ní éí shidineʼé Ííjipdę́ę́ʼ chʼídííʼish.’ Ákoósh Mózes tʼóó bikʼee bił adahayóí?

Mózes ánáádooʼniid: ‘Háíshąʼ niníłʼaʼ dashiłníigo shąʼ, haʼátʼíí dideeshniił?’ God ánáhodooʼniid: ‘Jiihóvah, Éíbraham biDiyin God áádóó Áízak biDiyin God índa Jéíkab biDiyin God ashííłʼaʼ, bididííniił.’ Mózes ánáádooʼniid: ‘Doo dashíistsʼą́ą́ʼgóoshąʼ?’ Jiihóvah éí Mózes yee yíká adoolwołii yił ííshjání áyiilaa. Tsin dah yítı̨́łígíí niʼjįʼ ahíłhan, hodííniid. Ńtʼééʼ tsin yę́ę tłʼiish silı̨́ı̨́ʼ! Áádóó Mózes éí tłʼiish yę́ę bitseeʼ jisił, ńtʼééʼ tsin násdlı̨́ı̨́ʼ. Jiihóvah ání: ‘Díí kwíinidzaago, binahjįʼ shá niníłʼaʼgo bee bééhózin doo.’

Mózes ání: ‘Shí doo ayóogo yáshtiʼ da.’ Jiihóvah áháłní: ‘Tʼáá shí kótʼéego nidishníigo yáníłtiʼ doo, dóó Éran nitsilí níká análwoʼ doo.’ Áko Mózes éí Jiihóvah hoł hólǫ́ǫgo hoł bééhózin áko beʼasdzą́ą́ dóó biyeʼ Ííjipgóó yił dah diikai.