Moisesi wakalele mo Midiaa omanima 40. Ngako anepela iya akala novana. Nthiki imwe etyi akalisa onongi mbae Komphunda Sinai amono otyipuka tyimwe tyihuvisa. Otyinkhondo tyikahi nokutema mahi omafo otyo ahapi! Etyi Moisesi etyimona, eivi ondaka imwe itundilila motyinkhondo otyo, yati: ‘Moisesi! Uhafuene-ko. Lula ononkhaku mokonda ove ukahi pomphangu ikola.’ Jeova watuma oandyu ipopie.

Moisesi atili unene owoma iya elihiki motyipala. Ondaka yati: ‘Ame ndyiete ononkhumbi ova Isilayeli vekahi nokumona. Mandyiveyovola ko Egitu andyivetuala kotyilongo tyikahi nawa. Ame naholovona ove opo uhongolele ovanthu vange okutunda mo Egitu.’ Okuti Moisesi wahuvile?

Moisesi apopi okuti: ‘Oityi mandyikapopia tyina vamphula okuti olie wekutuma?’ Huku akumbulula okuti: ‘Vepopila okuti Jeova, Huku ya Abraiau, Huku ya Isake, Huku ya Jako oe wekutuma.’ Moisesi apopi okuti: ‘Iya inkha kavanthehelela?’ Jeova apopila Moisesi okuti memukuatesako. Apopila Moisesi okuti yumba otyimuti tyove pohi. Etyi etyiyumba pohi atyityituka onyoka! Etyi Moisesi eikuata momutyila aikala vali otyimuti. Jeova emupopila okuti: ‘Tyina vamatale ovipuka mokalinga mavetavela okuti ame nekutuma.’

Moisesi apopi okuti: ‘Ame hityivili okupopia nawa.’ Jeova emupopila okuti: ‘Ame mandyikupopila etyi mokapopia iya mandyitumu Arau opo ekukuateseko.’ Etyi Moisesi aimbuka okuti Jeova memukuatesako apolo omukai wae novana vae avaende no ko Egitu.