Musa akatuura omuri Midiani kumara emyaka 40. Akaba aine omukazi n’abaana. Eizooba rimwe ku yaabaire ariisize entama ze haihi n’Orushozi Sinai, akareeba ekintu ekirikutangaaza. Orushaka rukaba nirwaka, kwonka rutarikusya! Musa ku yairiire haihi kureeba ahabw’enki rwabaire nirwaka, akahurira eiraka kuruga omu rushaka nirigira riti: ‘Musa! Otairira haihi. Juura enkaito omu bigyere byawe, ahakuba omwanya ogu oyemereiremu n’ogurikwera.’ Yehova niwe yaabaire naagamba kurabira omuri maraika.

Musa akatiina, yaayetwekyerera ahamaisho. Eiraka rikamugira riti: ‘Ndeebire okubonabonesibwa kw’Abaisraeli. Ninyija kubajuna, mbaihe omu mikono y’Abanyamisri mbatware omu nsi enungi. Naiwe oraihe abantu bangye omuri Misri.’ Torikuteekateeka ngu ekyo nikibaasa kuba kyatangaarize Musa?

Musa akabuuza ati: ‘Abantu ku barambuuze ngu n’oha okwoheereize, mbagarukemu nta?’ Ruhanga akagarukamu ati: ‘Obagire ngu Yehova, Ruhanga wa Abrahamu, Ruhanga wa Isaaka, kandi Ruhanga wa Yakobo niwe abantumireho.’ Musa akagarukamu ati: ‘Kwonka shi ku bakwanga kumpurira?’ Yehova akaha Musa obuhame ngu naija kumuhwera. Akagambira Musa kunaga enkoni ye ahansi. Enkoni egyo ekahinduka enjoka! Musa ku yaakwatsire aha mukira gw’enjoka, ekagaruka yaahinduka enkoni. Yehova akamugira ati: ‘Ku orikukora akamanyiso aka, nikaija kuba obuhame ngu nkwoheereize.’

Musa akagira ati: ‘Ti mba mugambi murungi.’ Yehova akamuraganisa ati: ‘Ndyakuhabura ebi origamba, kandi niinyija kwoheereza Arooni mwene sho kukuhwera.’ Musa ku yaamanyire ngu Yehova naija kumuhwera, akatwara omukazi we n’abatabani baagaruka Misri.