Moses läwd 40 Joa en Midian. Hee befried sikj un haud Kjinja. Aus hee eemol dicht bie dän Sinai-Boajch Schop heeden deed, sach hee waut besondret. En een Bosch wia Fia, oba daut vebrend nich! Aus Moses doa hanjinkj sikj daut to beseenen, hieed hee eene Stemm von em Bosch: “Moses! Komm nich dichta biea. Trakj dien Footich ut, wäajen du best opp heilje Ieed.” Daut wia Jehova, waut derch eenen Enjel räden deed.

Moses bedakjt sien Jesecht, wäajen hee Angst haud. De Stemm säd: “Ekj hab jeseenen, woo schwoa daut fa de Israeliten es. Ekj woa dee von de Ägipta raden un no een goodet Launt brinjen. Du best dee, waut mien Volkj ut Ägipten rutbrinjen woat.” Jleefst nich uk, daut Moses sea vewundat wia?

Moses fruach: “Waut saul ekj sajen, wan dee froagen, wäa mie jeschekjt haft?” Gott säd: “Saj: ‘Jehova haft mie jeschekjt, Abraham un Isaak un Jakob äa Gott.’” Dan säd Moses: “Waut oba, wan daut Volkj nich horchen well?” Jehova jeef Moses een Tieekjen, daut hee am halpen wudd. Hee säd, Moses sull sienen Stock no de Ieed schmieten. Dan wort de Stock eene Schlang! Aus Moses de Schlang aum Zoagel pakt, wort daut wada een Stock. Jehova säd: “Wan dee dit Tieekjen seenen, dan woaren dee jleewen, daut ekj die jeschekjt hab.”

Moses säd: “Ekj sie nich goot em räden.” Jehova vespruak dän: “Ekj woa die sajen, waut du räden saust, un ekj woa dienen Brooda Aaron met die metschekjen, daut dee die halpt.” Nu wist Moses, Jehova wudd am halpen. Hee reisd met siene Fru un siene Junges trigj no Ägipten.