Moisesqa 40 watasta Madianpi tiyakushaspa casarakorqa, wawasniyojtaj karqa. Uj diaqa, Sinaí orqo chaynejpi ovejasninta michishaspa uj sachʼitata laurashajta rikorqa. Chay sachʼitatajrí mana qʼolaykusharqachu. Moisés chayta qhawarej chimpashaspataj uj parlayta uyarerqa. Chay parlayqa nimorqa: “Moisés, ama astawan qayllamuychu. Jukʼutasniykita lluchʼukuy, imaraykuchus kay jallpʼaqa Diospaj tʼaqasqa”, nispa. Chaytaqa Jehová Dios uj angelninnejta nerqa.

Moisesqa mancharikuspa uyanta pakaykukorqa. Diostaj nerqa: “Israelitas Egiptopi mayta ñakʼarishasqankuta rikuni. Egiptomanta orqhomuspa paykunata sumaj jallpʼaman pusasaj. Chayrayku munani qan israelitasta Egiptomanta orqhomunaykita”, nispa. Moisestaj chayta uyarispa tʼukorqachá.

Moisesqa nerqa: “¿Imatataj nisaj israelitas ‘pitaj kachamusunki’ niwajtinkuri?”, nispa. Diostaj nerqa: “Abrahanpata, Isaacpata, Jacobpata Diosnin kachamuwan nispa ninki”. Moisestaj nerqa: “¿Mana kasuwajtinkurí?”, nispa. Jehová Diosqa payta yanapananta rikuchinanpaj uj señalta qorqa. Diosqa payman nerqa tojnunta pampaman choqananta. Choqasqantawantaj tojnunqa katariman tukorqa. Chantá Moisesqa chay katarita chupanmanta japʼiykorqa, watejmantataj tojnuman tukuporqa. Chantá Dios nerqa: “Kay milagrota ruwaspa rikuchinki noqa kachasusqayta”, nispa.

Moisestaj nerqa: “Mana runaspa ñaupaqenpi allinta parlayta atillanichu”, nispa. Jehová Diostaj nerqa: “Noqa nisqayki imatachus ninaykita. Chantapis hermanoyki Aaronta yanapasunanpaj kachasaj”, nispa. Moisesqa Jehová Dios yanapananta yachaspa, Egiptoman kuterqa warminwan wawasninwan khuska.