Moisés xkʼojiʼ 40 junabʼ pa Madián. Pa ri tiempo riʼ xkʼuliʼ xuqujeʼ xkʼojiʼ ralkʼwal. Jun qʼij tajin kuchajij ri e uchij naqaj che ri juyubʼ Sinaí xuqujeʼ xril jun jastaq che rilom ta ojer. Jun alaj cheʼ che umajom qʼaqʼ, ¡are kʼu kkʼat taj! Are chiʼ ri Moisés xqebʼ che rilik ri tajin kkʼulmatajik, xuta jun chʼabʼal che kel lo pa ri alaj cheʼ. Ri chʼabʼal xubʼij che: «¡Moisés! Katqebʼ ta más. Chawesaj ri axajabʼ, rumal che tajin katbʼin pa chʼajchʼojalaj ulew». Are ri Jehová, tajin kukoj jun ángel rech kchʼaw rukʼ ri Moisés.

Moisés xuxibʼij ribʼ, rumal laʼ xuchʼuq ri upalaj. Ri chʼabʼal xubʼij: «Wilom che ri israelitas sibʼalaj kkiriq kʼax. Keʼinkol pa kiqʼabʼ ri egipcios xuqujeʼ keʼinkʼam bʼi pa jun utzalaj ulew. Xuqujeʼ kwaj che at kawesaj ri nutinamit pa Egipto». ¿La kachomaj che Moisés xumayo?

Moisés xutaʼ che: «¿Jas kinbʼij are chiʼ kkitaʼ chwe jachin xintaqow uloq?». Dios xubʼij che: «Chabʼij chke che are Jehová ri uDios ri Abrahán, ri uDios ri Isaac xuqujeʼ ri uDios ri Jacob xintaqow uloq». Moisés xubʼij: «We ri tinamit kutatabʼej ta ri kinbʼij chke». Jehová xuya jun kʼutbʼal che rech kukʼut chuwach che qas ktoʼ rumal. Xubʼij che kukʼaq ri uchʼamiʼy pa ri ulew, are chiʼ je xubʼano, ¡ri chʼamiʼy xux jun kumatz! Tekʼuriʼ, Moisés xuchap ri kumatz che ri ujeʼ, xux chi jumul chʼamiʼy. Tekʼuriʼ Jehová xubʼij che: «Are chiʼ kabʼan wajun milagro riʼ, kakʼut riʼ che in xatintaq bʼik».

Are kʼu ri Moisés xubʼij: «qas ta kinkunik kintzijon kukʼ ri winaq». Jehová xutzujuj che: «In kinbʼij chawe ri kaya ubʼixik, xuqujeʼ, kintaq bʼi ri awachalal Aarón rech katutoʼ». Rumal che Moisés retaʼm chik che Jehová kutoʼ, xtzalij pa Egipto xukʼam bʼi ri rixoqil xuqujeʼ ri e ralkʼwal.