Moisesca 40 huatacunatami Madián llajtapi causarca. Chaipimi cazarashpa huahuacunata charirca. Shuj punllaca Moisesca Sinaí urcu cꞌuchullapi ovejacunata michicushpami nunca mana ricushcata ricurca. Shuj jatun yurapimi nina lunyacurca. Pero chai yuraca mana ruparcachu. Moisés ricunaman cꞌuchuyacujpica chai yuramanta shuj rimashca uyarishpami, ‘caimanca ama cꞌuchuyamuichu. Can shayacun cai allpaca ñucapajllami chaquimanta pargateta llujshichi’ nirca. Jehovami shuj angelta Moiseshuan parlachicurca.

Moisesca mancharishpami ñahuita taparirca. Chai rimashcami, ‘israelitacuna Egipto llajtapi llaquita apacujtaca ricushcanimi. Chaimi paicunapaj maquimanta cacharichishpa, sumaj allpaman pushagrini. Cantami ñuca llajtata Egiptomanta llujshichichun agllashcani’ nirca. ¿Moisesca ima shinashi sintirishcanga?

Moisesca, ‘¿cantaca pitaj cacharca, nijpica imatataj nishari?’ nishpami tapurca. Chaimi Diosca, ‘Abrahampaj, Isaacpaj, Jacobpaj Jehová Diosmi cancunapajman cachan ningui’ nircami. Moisesca, ‘¿israelitacuna mana crijpica?’ nishpami tapurca. Chaimi Diosca shuj milagrota rurashpa paita ayudanata ricuchirca. Paipaj caspita pambaman shitachunmi mañarca. Caspita shitajpica shuj culebrami tucurca. Qꞌuipaca Moisés culebrapaj chupapi japijpica cutinmi caspi tucurca. Chaita ricuchishpami Diosca, ‘cai milagrota can rurajpimi ñuca cachashcata cringacuna’ nirca.

Pero Moisesca, ‘ñucaca gentecunapaj ñaupajpica mana alli rimai tucunichu’ nircami. Chaimantami Diosca, ‘ñucami cantaca rimachisha. Ashtahuanpish cambaj huauqui Aarontami canta ayudachun cachasha’ nirca. Moisesca Jehová ayudanata yachashpami paipaj huarmita, huahuacunatapish apashpa Egiptoman tigrarca.