Moisesqa 40 watan Madianpi tiyaran. Chaypin casarakuran wawakunayoqpas karan. Juj p’unchaymi Sinaí orqoq qayllanpi ovejankunata michisharan, jinan rikuran raurashaq sach’ata, ichaqa manan rupharanchu. Chaymi Moisesqa allinta rikunanpaq cercaykuran. Chaypin juj kunka nimuran: “¡Moisés! Ama jamuychu. Usutaykita ch’utikuy, kay lugarqa santon”, nispa. Jehová Diosmi juj angelwan Moisesta rimapayasharan.

Moisesqa manchakuymantan uyanta tapakuran. Jinan angelqa nillarantaq: “Rikunin Israel llaqtay sufrisqanta. Egipto llaqtamanta libraspan juj sumaq allpaman apapusaq. Qanmi llaqtayta Egiptomanta orqonki”, nispa. Moisesqa admirakuranchá chayta uyarispa.

Jinan Moisesqa tapuran: “¿Pitaq kachamusunki? nispa niwaqtinkuri, ¿ima nispataq nisaq?”, nispa. Diostaq niran: “Abrahanpa, Isaacpa, Jacobpa Diosninmi kachamuwan”, nispa. Moisestaq niran: “¿Imatan ruwasaq mana kasuwaqtinku?”, nispa. Jinan Jehová Diosqa juj milagrota ruwaran yanapayninta rikuchinanpaq. Niranmi: “Taunaykita pampaman wijch’uy”, nispa. ¡Taunanmi mach’aqwayman tukuran! Chupanmanta Moisés jap’iqtintaq taunaman tukuran. Jinaspan Jehová Diosqa niran: “Kay milagrota rikuspan paykunaqa yachanqaku Jehová Dios kachamusqasuykita”, nispa.

Moisesmi nillarantaq: “Manan allin rimaqchu kani”, nispa. Chaymi Diosqa prometeran: “Noqan yachachisqayki imachus rimanaykita, jinaspapas hermanoyki Aarontan kachamusaq yanapanasuykipaq”, nispa. Jinan Moisesqa Jehová Diospa yanapananta yachaspa Egiptoman kutiran esposanta wawankunatawan aparikuspa.