Moisés runaguca Madián llactapica 40 huatacunatami causarca. Chai huatacunapica cazarashpa, huahuacunatapashmi charirca. Shuj punllaca Sinaí urcupi llamagucunata michijushpami shuj casha yura rupajujta ricushpa ninanda manllarirca. Shina rupajushpapash na tucurijtami ricurca. Moisesca ima pasajujta ricungapaj quimirishpami chai rupajuj yura ucumanda cashna nijta uyarca: “Moisés ama caiman quimirimuichu, cambaj chaquipi churajushcata Ilujchi. Can shayajuj alpaca, ñucapajlla shicanyachishca alpami” can nishpa. Jehová Diosmi shuj angelta parlachishpa Moisesman shina nijurca.

Moisesca ninanda manllarishpami ñavita quilparirca. Cutin cashna nijtami uyarca: ‘Ñuca agllashcacuna Egiptopi llaqui apanajujtaca alimi’ yachani. ‘Chaimandami paicunataca Egipto llactamanda Ilujchishpa juyailla’ alpaguman pushasha. ‘Ñuca agllashca israelitacunata, Egiptomanda Ilujchimuchunmi candaca cachasha’ nishpa. Chaita uyashpaca Moisesca ¿imashinashi sintirirca?

Moisesca nircami: ‘Pita cachamurca nishpa tapujpica ¿ima nishpashi paicunaman tigrachisha?’ nishpa. Diosca cashnami nirca: ‘Cangunapa ñaupa taitacunapa Taita Dios, Abrahanba Taita Dios, Isaacpa Taita Dios, Jacobpa Taita Diosmi cangunapaman cachamuhuarca’ ningui nishpa. Moisesca cashnami nirca: Paicuna ñucata na cazujpica ¿imatata rurasha? Jehová Diosca Moisesta ayudangapami cashna nirca: “Chai caspita alpaman shitai” nishpa. Moisés shina shitajpimi, “chai caspica culebraman tigrarca”. Moisés chai culebrata chupamanda japijpica cutinmi caspiman tigrarca. Chaimi Jehová Diosca nirca, chai milagrota ricushpami ñuca cachamushcata crinajunga nishpa.

Shinapash Moisesca nircami: “Aij, Jatun Dioslla, ima horallapash ali rimaj runaca, na cashcanichu” nishpa. Jehová Diosca nircami: ‘Cunanga rilla, can imata rimanatapash ñucami yachachisha’. Canda ayudachunbash canba huauqui Aarondami cachasha nishpa. Moisesca Jehová Dios ayudanata ali yachashpami, paipa huarmiguta, paipa huahuacunatapash apashpa Egiptoman rirca.