O Mojsije živindža ko Madijan 40 berš. Uduri ženindža pe hem hine lje čhave. Jekh dive, dži arakhlja e bakren uzi planina Sinaj, dikhlja diso čudno. Jekh grm hine lje jag, ama nisar te thabljol! Ked o Mojsije dželo popaše te dikhel soj tano odova, šundža glaso ando grm sar vačeri ljese: „Mojsije! Ma ava popaše. Huljav te sandale sose terdžoveja ko sveto than.“ Odova vačerdža o Jehova prekalo jekh anđeo.

O Mojsije darandilo hem odoljese učhardža po muj. O glaso phendža: „Me dikhljum kobor tane mučime o Izraelcija. Me ka spasinav ljen ando Egipćanja hem ka igarav ljen ki šukar phuv. Tu ka ikalje me narodo ando Egipat.“ So mislineja, da li o Mojsije iznenadindža pe ked šundža akava?

O Mojsije pučlja: „So ka vačerav ked o manuša ka pučen man ko bičhaldža man?“ O Devel odgovorindža ljese: „Vačer ljendže so bičhaldža tut o Jehova, o Devel e Avrahameso, o Devel e Isakoso, hem o Devel e Jakoveso.“ Ama, o Mojsije phendža: „So ako o manuša na šunena man?“ Tegani o Jehova čerdža čudo te šaj te dokažini e Mojsijese so ka pomožini lje. Ov phendža e Mojsijese te fordel po kaš ki phuv. Tegani, o kaš ulo sap! Ked o Mojsije doljindža e sape andi porik, ov paljem ulo kaš. O Jehova vačerdža: „Ked o manuša ka dikhen akava, ka verujinen so me bičhaldžum tut.“

O Mojsije vačerdža: „Ama me na vačerava šukar.“ Odoljese o Jehova obećindža ljese: „Me ka phenav tuče so te vačere hem ka bičhalav te phralje, e Arone, te pomožini tut.“ Odoljese so džandža soj tano o Jehova oljeja, o Mojsije ljelja pe romnja hem pe čhaven hem dželo ko Egipat.