О Моисеё прожудя андо Мадиамо 40 бэрш. Во женисайля, и лэстэ арақаделэпэ бэятцэ. Еқвар, кала во пасыяс лэ бакрэн паша фартэ баро плай Синай, во додиқля кусто, пэ саво ԥэнэнас терново. Кадэва кусто ԥаболас, но на сԥаболас! О Моисеё поджыля тэ диқэл, со кода. Во кацаво никала на диқля. И анда кадэва кусто ашунделяпэ ӷолосо: «Моисеё, на поджа май пашэ! Пэрнандю. Ту тердёс пэ свынто ԥув». Када сас о Иегова. Во дэлас дума лэ Моисеёса через о анӷело.

О Моисеё пэрэдарайля и приушарадя о муй. Кадэва ӷолосо ԥэндя: «Мэ диқав, сар лэ израильтянонэнди ԥарэс. Мэ залава лэн лэ египтянонэндар и анава интя, кай и лащи ԥув. И ту виандярэса мэрно народо анда Египто». Погиндосар, со сас кай о Моисеё андо ди?

О Моисеё пушля: «Со мэ тэ ԥэнав, сар и мануша пушэна: „Ко тут бишалдя?“» О Дэл ԥэндя: «Ԥэн лэнди, кай тут бишалдя о Иегова, лэ Авраамоско, лэ Исаакоско, лэ Иаковоско Дэл». О Моисеё пушля: «Ай сар и мануша ман на ашунэна?» О Иегова ԥэндя, кай во дэла зор лэ Моисеёсти. Сар? Во мангля лэс тэ шол пэ ԥув пэсти рувли. И сразу и рувли ашэля сапэса! Ай кала о Моисеё ля лэ сапэс пала пури, во упалэ ашэля рувляса. О Иегова ԥэндя: «Сыкав лэнди кадэя чуда, и вонэ патяна, кай када мэ тут бишалдэм».

О Моисеё ԥэндя: «Мэ на ӷанав шукарнэс тэ дав дума». О Иегова дя алав: «Мэ подԥэнава тути, со тэ ԥэнэс, и дава тути помощникос, када тиро ԥрал о Аароно». Важ кода кай о Моисеё ӷанэнас, кай о Иегова лэсти поможыя и подритярэла лэс, во пэстиря хулаяса и лэ шавэнца жыля андо Египто.