Moïse asara kodro na Madian asara ngu 40. Lo sara mariage na lo dû amolenge. Mbeni lâ, na ngoi so lo ngbâ ti bata ataba ti lo nduru na Hoto ti Sinaï, lo bâ mbeni ye so asara si li ti lo akpe. Mbeni keke ti kî so wâ amû terê ni kue me wâ ni agbi keke ni ape. Tongana Moïse ague nduru na terê ni ti bâ nyen la apassé, lo mä mbeni go na yâ ti kete keke ni, a tene na lo: ‘Moïse! Mo ga nduru mingi na ni ape. Mo zi poro na gere ti mo ndali ti so ndo so mo luti dä so ayeke nzoni-kue.’ A yeke Jéhovah la asara tënë na lo na lege ti mbeni ange.

Mbeto ahon ndö ti Moïse, lo kanga ye na lê ti lo. Go ni atene: ‘Mbi bâ pasi ti azo ti Israël. Mbi yeke sö ande ala na maboko ti azo ti Égypte na mbi yeke gue na ala na mbeni nzoni sese. Mo yeke zo so ayeke sigi na azo ti mbi na Égypte.’ Mo pensé so tënë so apika bê ti Moïse ape?

Moïse atene: ‘Tongana azo ni ahunda mbi atene zo wa la atokua mbi, mbi yeke tene ande nyen na ala?’ Nzapa atene na lo: ‘Mo tene na ala so Jéhovah, Nzapa ti Abraham, Nzapa ti Isaac, nga Nzapa ti Jacob la atokua mbi.’ Na pekoni Moïse atene: ‘Me ka tongana azo ni amä mbi ape?’ Jéhovah afa na Moïse aye so afa so lo yeke aidé lo. Lo tene na Moïse ti bi keke ti lo na sese. Keke ni aga ngbo! Na tongana Moïse agbu ngbo ni na damba ti lo, ngbo ni akiri aga keke. Jéhovah atene: ‘Tongana mo sara aye so, a yeke fa biani so mbi la mbi tokua mo.’

Moïse atene: ‘Mbi hinga ti sara tënë nzoni ape.’ Jéhovah atene na lo: ‘Mbi yeke fa na mo tënë so mo lingbi ti tene, nga mbi yeke tokua na mo ita ti mo Aaron ti mû maboko na mo.’ So Moïse ahinga so Jéhovah ayeke na lo, lo mû wali ti lo nga na amolenge ti lo na lo kiri na Égypte.