Nipetraky ta Midianina tany Mosesy tanatini-40 tao. Nanambaly ie, le nanan’anaky. Ndraiky andro lafa niaraky ty aondriny tanilani- Vohitsy Sinay teo ie, le nahita raha mahatseriky. Nisy hazo raiky nirehitsy, fe tsy nimay! Namonjy teny Mosesy satria nahatseriky azy raha iny. Bakeo nisy feo baka amy hazo iny ao hoe: ‘Mosesy e! Ka mamonjy bakao. Afaho kapanao iny satria tany masy itsangana- nao ’o.’ Jehovah niresaky io fe nampiasa anjely.

Natahotsy Mosesy ka nisaronany ty tarehiny. Nivola ndraiky feo iny hoe: ‘Fa hitako ty fijaleani-Israelita. Havotako baka amy Ejipsianina reo eo rozy, le handesiko amy tany soa zay any. Iha ro handay ani-oloko reo hiala ani-Ejipta.’ Hatoforan-draha Mosesy tamy zay!

Nanontany Mosesy hoe: ‘Ka ino ty havaliko laha anontanean-drozy aho hoe ia naniraky anao ’o?’ Le hoy Ndranahary: ‘Volano amin-drozy hoe Jehovah, azy Ndranaharini-Abrahama, Ndranaharini-Isaka, noho Ndranaharini-Jakoba iny naniraky ahy ho aminareo atoy io.’ Bakeo nivola Mosesy hoe: ‘Ka laha tsy mijanjy ahy rozy?’ Nameani-Jehovah porofo Mosesy hoe hanampy azy ie. Nivola tamy Mosesy ie hoe: ‘Atoraho ambany eo fitono an-tananao iny.’ Nanjary bibilava amy zay fitono iny! Lafa nirambesini-Mosesy tamy rambony bibilava iny, le nanjary fitono ndraiky. Hoy Jehovah: ‘Lafa manao fahagagà io iha, le ho hitan-drozy fa zaho ro naniraky anao.’

Nivola Mosesy hoe: ‘Tsy mahay miresaky any aho.’ Nampitamà azy Jehovah hoe: ‘Ao fa hatoroko anao ty raha hovolaninao, sady hirahiko Arona rahalahinao hanampy anao.’ Haini-Mosesy fa poro azy Jehovah, ka nandesiny nimpoly ta Ejipta any ty valy amin’anakiny.