E 40 tausaga na nofo ai Mose i Mitiana. Sa faaipoipo o ia ma maua sana fanau. I se tasi aso a o leoleo ana mamoe e lata i le mauga o Sinai, na ia vaaia ai se mea e ofoofogia. Na ia iloa atu se laau tuitui o loo mumū mai ai le afi, ae e lē o mū ai le laau. Ina ua faalatalata atu Mose e vaai pe aiseā ua mumū ai le laau, ae ia faalogoina ai se leo o sau mai i totonu o le laau o loo faapea mai: ʻMose, aua e te sōsō mai i inei. Aveese ou seevae, auā e paia le eleele o loo e tū ai.’ O Ieova e ona le leo lenā, ae o loo ia tautala mai e ala i se agelu.

Na fefe Mose ma pupuni ona mata. Na faapea mai le leo: ʻUa ou vaaia le sauāina o tagata Isaraelu. O le a ou faasaoina i latou mai i tagata Aikupito ma ave i latou i se nuu lelei. O le a e aveesea oʻu tagata mai i Aikupito.’ O le ā sou manatu, pe na teʻi Mose i lenā faatonuga?

Na fesili Mose: ʻO le ā laʻu tala e fai i tagata pe a fesili mai po o ai na auina atu aʻu?’ Na faapea mai le Atua: ʻIa e fai i ai na auina atu oe e Ieova, le Atua o Aperaamo, le Atua o Isaako, ma le Atua o Iakopo.’ Ona fai atu lea o Mose: ʻAe faapefea pe a lē faalogo mai tagata iā te aʻu?’ Na aumai e Ieova iā Mose se faamaoniga o le a Ia fesoasoani mai iā te ia. Na ia faapea mai iā Mose e togi lona tootoo i le palapala, ona avea ai lea o le tootoo ma gata. Ina ua tago atu Mose i le siʻusiʻu o le gata, ae toe liu i le tootoo. Na faapea mai Ieova: ʻPe a e faia lenei mea, o le a faamaonia atu ai o aʻu na auina atu oe.’

Na tali atu Mose: ʻE lē lelei saʻu failauga.’ Na folafola mai e Ieova: ʻO le a ou taʻu atu le tala e fai i tagata, ma o le a ou auina atu lou uso o Arona e fesoasoani iā te oe.’ O le iloaina e Mose o le a fesoasoani Ieova iā te ia, na ia ave ai loa lana avā ma ona atalii ma toe foʻi i Aikupito.