Musa Midýan ýurdunda 40 ýyl ýaşady, şol ýerde öýlendi. Onuň çagalary hem boldy. Bir gün Musa Sinaý dagynyň ýanynda goýun bakyp ýördi. Şonda ýandagyň ýanyp durandygyny görýär. Onuň ody hiç öçmeýärdi. Musa haýran galyp, ýandagyň ýanyna barýar. Birdenem oduň içinden şeýle ses eşidilýär: «Musa, oduň ýanyna gelme. Aýakgabyňy çykar, sen mukaddes ýerde dursuň». Ýehowa Musa bilen perişdesi arkaly gepleşdi.

Musa gorkup ýüzüni ýapdy. Soň ýene şeýle ses eşidildi: «Ysraýyllar Müsürde gul bolup ýaşaýar. Men olary Müsürden alyp gaýtjak, gowy ýurda getirjek. Olary Müsürden sen çykararsyň». Şonda Musa haýran galandyr.

Musa: «„Seni kim iberdi?“ diýseler, näme diýeýin?» diýýär. Hudaý: «Meni Ybraýymyň, Yshagyň, Ýakubyň Hudaýy Ýehowa iberdi diý» diýýär. Musa: «Adamlar meni diňlemese, näme edeýin?» diýýär. Ýehowa Musa kömek etjekdigini aýdýar. Soňra: «Taýagyňy ýere taşla» diýýär. Musa taýagyny ýere taşlaýar, taýak şol bada ýylana öwrülýär. Ol ýylanyň guýrugyndan tutup galdyrýar, ýylan ýene taýaga öwrülýär. Ýehowa: «Taýak ýylana öwrülende, adamlar seni kimiň iberendigini bilerler» diýýär.

Musa: «Men gowy gepläp bilemok» diýýär. Ýehowa: «Näme aýtmalydygyny öwrederin. Doganyň Harun saňa kömek eder» diýýär. Musa Ýehowanyň kömek etjegini bilensoň, aýalyny we çagalaryny alyp Müsüre gidýär.