Ja Moisés ti ajyi 40 jabʼil bʼa Madián. Ja tiw nupani sok ajyi yuntikil. Jun kʼakʼu yajni wan stalnajel ja xchejik mojan bʼa wits Sinaí, ay jas jel cham yila. Jun ibʼe kʼul wan ajlel, ¡pe mi stsiki! Yajni mojxi bʼa yiljel jasa wan ekʼeli, ti eljan jun kʼumal sok yala: «¡Moisés! Mokxa mojxan mas. Sopo wa xanabʼi, yujni ja bʼaya slujmal Dyos». Yeʼn ja Jyoba, wan yajel makunuk jun anjel bʼa skʼumajel ja Moisés.

Ja Moisés xiwi, ja yuj smaka ja sati. Ja kʼumali xcholo: «Kilunej ja israʼelenyo jel wane yijel wokol. Oj ka eluke libre ja bʼa Egipto sok yijel och bʼa jun lekil luʼum. Sok wani xkʼana weʼn oj wa eluk ja jchonabʼ ja bʼa Egipto». ¿Cham maʼ yabʼ ja it ja Moisés?

Ja Moisés sjobʼo: «¿Jasa oj kal ta sjobʼoweki maʼ sjekunejon?». Ja Dyosi sjakʼa: «Ala yabʼye yeʼn ja Jyoba, ja sDyos ja Abrahán, ja sDyos ja Isaac sok ja sDyos ja Jacob ja maʼ sjekuneja». Ja Moisés yala: «¿Jaxa ta mi skʼuʼaneki?». Ja Jyoba yayi jun preba bʼa sjejelyi ojni koltajuk. Yala yabʼ a-sjip bʼa luʼum ja snajbʼanteʼ. Yajni sjipa, ¡pax jun bʼitsʼbʼichan! Tsaʼan, ja Moisés syamayi ja sneji, cha pax jun najbʼanteʼ. Anto ja Jyoba xcholo: «Yajni xa kʼulan ja milagro jaw, jach oja jeʼ keʼn jekuneja».

Pe ja Moisés yala: «Mi jel x-el jkʼumal». Ja Jyoba skʼapayi: «Keʼn oj kalawabʼ ja jas oja wali, cha oj jekawi jawa moj-alijel Aarón bʼa oj skoltaya». Yuja Moisés snaʼa ojni koltajuk yuja Jyoba, kumxi bʼa Egipto sok yiʼaj och ja xcheʼumi soka yuntikili.