Моисей Мадианга 40 чыл чурттаан. Ол өгленип алгаш, ажы-төлдүг апарган. Бир катап Синай дагның чанынга хойларын кадарып чорааш, тенниг хып турар чадаң ыяш көрүп каан. Ол хып турган-даа болза, өрттенмээн! Чуртталгазынга Моисей ындыг чүүл кажан-даа көрүп көрбээн. Ол чадаң ыяшче чоокшулап чеде бээрге, оон үн дыңналган: «Моисей, бээр чоокшулава! Идииң уштуп ал, турар чериң ыдыктыг чер-дир». Ынчаар Иегова Моисей-биле ангели таварыштыр чугаалашкан.

Моисей кортканындан арнын дуглапкан. Иегова аңаа мынча дээн: «Израильчилерниң кайы хире хинчектенип турарын көрүп тур мен. Мен оларны египетчилерден камгалааш, эки черге эккээр мен. Мээң чонумну Египеттен сен үндүрер сен». Моисей кайы хире кайгаан деп бодаар сен?

Моисей айтырган: «Улус сени кым чоргузупту дээрге, чүү дээр мен?» Бурган аңаа: «Авраамның, Исаактың, Иаковтуң Бурганы чоргузупкан дээр сен» — дээн. Моисей катап база айтырган: «А олар мени дыңнавас болза канчаар мен?» Ынчан Иегова Моисейге дузалаарын аазаан. Ол ону даянгыыжын черже октаптарын дилээн. Моисей даянгыыжын черже октаптарга, ол чылан апарган! Чыланның кудуруундан тудуп алырга, ол катап даянгыыш апарган. Иегова аңаа: «Бо хуулгаазынны көргүзүптериңге, мени чоргузупкан деп, олар бүзүрей бээр» — дээн.

«Мээң чугаам чечен-мерген эвес» — деп, Моисей удурланган. Иегова аңаа мынча деп аазаан: «Сеңээ чүнү чугаалаарын айтып бээр мен. Дузалакчы кылдыр Аарон акыңны база бээр мен». Ынчан Моисей Иегованың деткимчезинге бүзүрей бергеш, кадайы, оолдары-биле Египетче чорупкан.