Mushe o dzula Midiani miṅwaha ya 40. O vhinga nahone a vha na vhana. Ḽiṅwe ḓuvha musi a tshi khou ṱhogomela nngu dzawe tsini na Thavha ya Sinai, a vhona tshithu tshi mangadzaho. Tshiṱaka tsha mipfa tshi khou duga, fhedzi tsho vha tshi sa khou swa! Musi Mushe a tshi sendela u itela u vhona uri hu khou itea mini, a pfa ipfi ḽi tshi bva tshiṱakani ḽi tshi ri: ‘Mushe! Ni songo sendela tsini. Bvulani zwienda zwaṋu ngauri no ima fhethu hukhethwa.’ Ndi Yehova we a vha a tshi khou amba a tshi shumisa muruṅwa.

Mushe a ofha nahone a thivha tshifhaṱuwo tshawe. Ipfi ḽa ri: ‘Ndo vhona u shengela ha Vhaisiraele. Ndi ḓo vha vhofholola kha Vhaegipita nahone nda vha isa shangoni ḽavhuḓi. Ndi inwi ane a ḓo ranga phanḓa vhathu vhanga u bva Egipita.’ Naa a ni humbuli uri zwenezwo zwi nga vha zwo mangadza Mushe?

Mushe o vhudzisa a ri: ‘Ndi ḓo ri mini musi vhathu vha tshi mmbudzisa uri ndo rumiwa nga nnyi?’ Mudzimu a fhindula a ri: ‘Vha vhudzeni uri no rumiwa nga Yehova, Mudzimu wa Abrahamu, Mudzimu wa Isaka na Mudzimu wa Yakobo.’ Nga zwenezwo Mushe a ri: ‘Ndi ḓo ita mini arali vhathu vha sa nthetshelesa?’ Yehova a ṋea Mushe vhuṱanzi ha uri u ḓo mu thusa. O vhudza Mushe uri a laṱe thonga yawe fhasi. Thonga ya shanduka ya vha ṋowa! Musi Mushe a tshi fara yeneyo ṋowa nga mutshila, ya dovha ya shanduka ya vha thonga. Yehova a ri: ‘Musi ni tshi ita hovhu vhuṱolo, zwi ḓo sumbedza uri no rumiwa nga nṋe.’

Mushe a ri: ‘A thi koni u amba.’ Yehova a mu fulufhedzisa: ‘Ndi ḓo ni vhudza zwine na fanela u zwi amba nahone ndi ḓo ruma mukomana waṋu Aroni uri a ni thuse.’ A tshi ḓivha uri Yehova u ḓo vha nae, Mushe a dzhia mufumakadzi na vhana vhawe vha vhatukana nahone a humela Egipita.