Moiseseʼ kuxlaj 40 años tu kaajil Madián. Teʼ kʼiinoʼoboʼ tsʼoʼok u beel yéetel anchaj u paalaloʼob. Junpʼéel kʼiin táan u kanáantik u taamanoʼob naatsʼ tiʼ u Puʼukil Sinaíeʼ, tu yilaj junpʼéel baʼal beet u jaʼakʼal u yóol. Junkúul chan cheʼeʼ táan u tóochʼbal, ¡chéen baʼaleʼ maʼ tu jáabal! Le ka náatsʼ Moisés u jach ileʼ, tu yuʼubaj u jóokʼol junpʼéel tʼaan ichil le cheʼoʼ, ka aʼalaʼabtiʼ: ‹¡Moisés! Maʼ a maas náatsʼal. Pit a xaanab, tumen le lugar tuʼux waʼalakbalechoʼ santo›. Le máax tʼaanajoʼ Jéeoba, chéen meyajnajtiʼ juntúul ángel utiaʼal u tʼaan yéetel Moisés.

Moiseseʼ sajakchaji, le oʼolal tu pixaj u yich. Ka túun aʼalaʼabtiʼ: ‹Teneʼ tsʼoʼok in wilik bix u sen muʼyaj le israelitaʼoboʼ. Yaan in tokikoʼob tu kʼab le egipcioʼoboʼ utiaʼal in biskoʼob tiʼ junpʼéel luʼum jach maʼalob. Teneʼ in kʼáat ka xiʼikech a jóoʼs in kaajal tu luʼumil Egipto›. A tuklikeʼ, ¿jaʼakʼ wa u yóol Moisés yoʼolal le baʼax aʼalaʼabtiʼoʼ?

Moiseseʼ tu kʼáataj: ‹¿Baʼax ken in waʼaltiʼob ken u kʼáatoʼob máax túuxten?›. Dioseʼ tu yaʼalajtiʼ: ‹Aʼaltiʼobeʼ Jéeoba, u Dios Abrahán, u Dios Isaak yéetel u Dios Jacob túuxtech›. Moiseseʼ tu yaʼalaj: ‹¿Kux túun wa maʼ tu creertkenoʼob?›. Jéeobaeʼ tu yeʼesajtiʼ jeʼel u yáantikeʼ. Tu yaʼalajtiʼ ka u pul u xóolteʼ teʼ luʼumoʼ, le ka tu beeteʼ, ¡le xóolteʼoʼ suunaj juntúul kaan! Ka tsʼoʼokeʼ Moiseseʼ tu machaj tu nej le kaanoʼ ka suunaj tu kaʼatéen junpʼéel xóolteʼ. Jéeoba túuneʼ tu yaʼalajtiʼ: ‹Ken a beet le milagroaʼ yaan a weʼesik teen túuxtech›.

Chéen baʼaleʼ Moiseseʼ tu yaʼalaj: ‹Teneʼ istikyaj in tʼaan tu táan yaʼab máakoʼob›. Jéeobaeʼ tu yaʼalajtiʼ: ‹Teen kin aʼaliktech baʼax ken a waʼale, tsʼoʼoleʼ yaan in túuxtik a sukuʼun Aarón utiaʼal ka u yáantech›. Ka tsʼoʼok u yuʼubik Moisés yaan u yáantaʼal tumen Jéeobaeʼ, suunaj Egipto yéetel u yatan bey xan yéetel u paalaloʼob.