Ba bi nyégsa bon ba Israel i sal ni ngui kiki minkol. Yéhôva a bi om Môsé ni Arôn yak Faraô ni unu nwin: ‘Nwas litén jem li kee, le li bégés me i ñoñ.’ Ni ngôk, Faraô a timbhe le: ‘Lipôdôl li Yéhôva li nkal bé me to jam, m’a nwas bé ki to bon ba Israel le ba kee.’ Mbus, Faraô a énél bo le ba sal ni ngui iloo ngéda bisu. Yéhôva a bé lama kodol Faraô. Baa u nyi lelaa? A bi lona jôm li dimala i Égiptô. Yéhôva a kal Môsé le: ‘Faraô a ta bé i emble me. Yani kegla, a’ ba i lom Nil. Ke boma nye nyoo, u kal ki nye le, hala kiki a ntjél nwas litén jem, malép momasôna ma lom Nil ma nyila matjél.’ Môsé a bi nôgôl Djob, a ke, a boma Faraô. Faraô a bé béñge Arôn a mbép ntoñgo wé i lom Nil, malép ma yila matjél. Lom a bi bôdôl numb béba njiñ, tjobi di wo, lom Nil a bééna ha bé malép ma nyo. Ndi to hala, Faraô a bi kônde tjél nwas bon ba Israel.

 Mbus dilo disaambok, Yéhôva a ep Môsé yak Faraô ni unu nwin le: ‘Ibale u nwas bé litén jem le li kee, Égiptô a mba nyonok ni minkoñgo.’ Arôn a pa ntoñgo wé, minkoñgo mi yon ni mbok yosôna. Mi bé ikété mandap map, i ngii binañ, ni ikété bipan. Minkoñgo mi bé homa nyensôna! Faraô a kal Môsé le a soohe Yéhôva inyu mélés himala hi. Faraô a bôn le a nwas bon ba Israel le ba kee. Jon Yéhôva a bi mélés himala. Bôt ba Égiptô ba kot mim mi minkoñgo nwind ndi nwind. Loñ i bôdôl numb bôô njiñ. Ndi, Faraô a bi témb a tjél le litén li Djob li kee.

Mbus ngéda, Yéhôva a kal Môsé le: ‘Arôn a bép biték ni ntoñgo wé, bi ga yila dikala.’ Ngéda a boñ hala, kunda yada, dikala di yon homa nyensôna. Bôt bahogi ba kal Faraô le: ‘Himala hini, hi nlôl ni Djob.’ Ndi to hala, Faraô a bi tjél nwas bon ba Israel.