Puwersahan na pinatrabaho nin magabat an mga Israelita bilang mga uripon. Pinaduman ni Jehova ki Faraon si Moises saka Aaron dara an mensaheng ini: ‘Tuguting maghali an banwaan ko tanganing sambahon ninda ako sa kaawagan.’ Mahambog na nagsimbag si Faraon: ‘Dai akong pakiaram sa sinasabi ni Jehova, asin dai ko tutugutan na maghali an mga Israelita.’ Dangan mas pinagabat pa ni Faraon su trabaho ninda. Kaya tatawan ni Jehova nin leksiyon si Faraon. Aram mo kun paano? Ipinaabot niya sa Ehipto an Sampulong Damat, o mga pasakit. Sinabihan ni Jehova si Moises: ‘Habo sakong magdangog ni Faraon. Sa aga, dumanan mo siya sa Salog nin Nilo, asin sabihon mo saiya na dahil habo niyang pahalion an sakuyang banwaan, magigin dugo an gabos na tubig sa Nilo.’ Nagsunod si Moises asin nagduman ki Faraon. Nahiling ni Faraon na pinakol ni Aaron kan sugkod kaini an Nilo, tapos nagin dugo an tubig sa salog. Buminata an salog, nagkagaradan su mga sira, asin wara nang maiinom na tubig hali sa Nilo. Habo pa giraray pahalion ni Faraon an mga Israelita.

 Pakalihis nin pitong aldaw, pinaduman giraray ni Jehova si Moises ki Faraon dara an mensaheng ini: ‘Kun dai mo papahalion an sakuyang banwaan, mapapano an Ehipto nin mga talapang.’ Habong magtugot ni Faraon, kaya itinaas ni Aaron an saiyang sugkod, asin napano nin talapang an Ehipto. May mga talapang sa mga harong, sa mga katre, pati sa mga mangko. May talapang maski sain! Sinabihan ni Faraon si Moises na makiulay ki Jehova na tapuson na an damat na ini. Nangako si Faraon na papahalion na niya an mga Israelita. Kaya pinundo ni Jehova su damat, asin tinarambak kan mga Ehipsiyo an mga gadan na talapang. Buminata an bilog na Ehipto. Pero habo na naman na pahalion ni Faraon an mga Israelita.

Kaya sinabi ni Jehova ki Moises: ‘Sabihan mo si Aaron na pukpukon kan sugkod niya an daga, asin an alpog magigin mga nuknok, o saradit na insektong nangangagat.’ Nagkaigwa tulos nin mga nuknok maski sain. May mga Ehipsiyo na nagsabi ki Faraon: ‘Hali sa Diyos an damat na ini.’ Pero, habo pa giraray pahalion ni Faraon an mga Israelita.