Abena Israele bali abasha kabili balebapatikisha ukubombesha. Yehova aebele Mose na Aarone ukuya kuli Farao no kumweba ati: ‘Leka abantu bandi baleya mu kumpepa mu matololo.’ Farao ayaswike ati: ‘Nshacite ifyo Yehova alefwaya, nakaana, abena Israele tabaye.’ Lyena Farao abebele ukulabomba sana ukucila ne fyo balebomba kale. Yehova ali no kusambilisha Farao icintu cimo icacindama. Bushe nawishiba ifyo ali no kucita? Aletele Ifinkunka 10 pa bena Egupti. Yehova aebele Mose ati: ‘Farao talecita ifyo ndemweba. Mailo ulucelo, akaya ku Mumana wa Naelo. Na iwe ukayeko e lyo ukamwebe ati, apo taulefwaya ukuti abantu bandi baye, nalalenga amenshi yonse aya mu Naelo yasanguke umulopa.’ Mose alicitile ifyo bamwebele kabili aliile na kuli Farao. Farao alemona uko Aarone aleuma inkoto yakwe pa mumana wa Naelo, na uko amenshi mu mumana yalesanguka umulopa. Umumana walitendeke ukununka, isabi lyalifwile kabili abantu balilekele ukunwa amenshi ya muli uyu mumana pantu yalenunka. Na lyo line Farao alikeene ukuleka abena Israele baye.

 Pa numa ya nshiku 7, Yehova aebele Mose ukuya kuli Farao no kumweba ati: ‘Nga tawaleke abantu bandi baye, mu calo ca Egupti monse mukaba bacula.’ Aarone aimishe inkonto yakwe e lyo bacula batendeka ukwisa mu calo conse. Abantu balesanga bacula mu mayanda yabo, apo balelaala, na mu mbale. Bacula bali fye konse fye! Farao aitile Mose ukuti apapaate Yehova pa kuti bacula bafume mu calo. Farao alaile ukuti ali no kuleka abena Israele baye mu kupepa Lesa. E ico Yehova alifumishepo icinkunka kabili abena Egupti balilongenye imiina iingi iya bacula abafwa. E lyo mu calo mwanunka. Lelo Farao alikeene ukuleka abena Israele baye.

Lyena Yehova aebele Mose ati: ‘Aarone akoome inkonto yakwe pa nshi kabili ulukungu lukasanguka utushishi utusuma.’ Ilyo line fye mu calo conse mwali fye utushishi tweka tweka. Abantu ba kwa Farao bamo bamwebele abati: ‘Ici cinkunka cifumine kuli Lesa.’ Lelo Farao alikeene ukuleka abena Israele baye.