Ol man Isrel oli stap wok slef long Ijip. Nao Jehova i sanem Moses mo Eron tufala i go luk Fero blong talem long hem se: ‘Yu mas letem ol man blong mi oli gofri, blong oli save go mekem wosip long mi long draeples.’ Fero i flas we i flas, i talem se: ‘Mi no save Jehova, mo bae mi no letem ol man Isrel oli go.’ Nao Fero i fosem ol man Isrel blong oli wok strong moa. Jehova i wantem se Fero i lanem wan lesen. ?Taswe hem i mekem wanem? Hem i mekem Ten Panis i kasem Ijip. Jehova i talem long Moses se: ‘Fero i no wantem lesin long mi. Tumora, long eli moning, bae hem i godaon long Nael Reva. Yu go talem long hem se, from we hem i no letem ol man blong mi oli go, wota blong Nael Reva bae i kam blad.’ Moses i obei long Jehova mo i go luk Fero. Fero i wajem Eron taem i kilim Nael Reva wetem wokingstik blong hem, nao i sek se wota blong reva ya i kam blad. Ol fis oli ded, reva i sting we i sting, mo ol man oli no moa save dring wota blong Nael Reva. Be Fero i no wantem letem ol man Isrel i go.

 Seven dei biaen, Jehova i sanem Moses i go talem long Fero se: ‘Sipos yu no letem ol man blong mi oli go, Ijip bae i fulap long ol frog.’ Eron i leftemap wokingstik blong hem, nao ol frog oli kamkamaot, oli kavremap evri ples long Ijip. Oli go insaed long haos blong ol man, bed blong olgeta, mo long ol plet blong olgeta tu. !Ol frog ya oli stap long evri ples! Nao Fero i talem long Moses blong i askem Jehova blong stopem trabol ya. Fero i promes se bambae hem i letem ol man Isrel oli go. Ale Jehova i stopem panis ya, mo ol man Ijip oli hivimap ol frog long ol bigbigfala hip. Olgeta ples i sting nogud. Be bakegen, Fero i no wantem letem ol man Isrel oli go.

Nao Jehova i talem long Moses se: ‘Eron i mas kilim graon wetem wokingstik blong hem, nao das bae i kam moskito.’ Wantaem nomo, ol moskito oli kam kavremap evri ples. Sam man blong Fero oli talem se: ‘Hemia wan panis we i kamaot long God.’ Be Fero i no wantem letem ol man Isrel oli go.