B’Égyptien be mbe be tibili’i b’Israélite. Ane Yéhôva a nga lôme Moïse ba Aaron na be ke kate Pharaon na: ‘Jô’é bôte bam be ke bo m’ésaé nkôte si.’ Mbôle Pharaon a mbe mebun, a nga jô na: ‘M’aye jô’é mia mi ke, amu me nji bisi jôme Yéhôva a jô.’ Ane Pharaon a nga dañe dañe tibili be. Nde Yéhôva a nga liti Pharaon za a né. Ye wo yeme jôm a nga bo? A nga soo bibubua awôm e si ya Égypte. Yéhôva a nga jô Moïse na: ‘Pharaon a nji kômbô vô’ôlô ma. Akiti mame tyé, kele koone nye Ôsôé ba loone na Nil. Éyoñe wé yene nye, kate nye na, mbôl a nji kômbô jô’é bôte bam be ke, mendime ya Nil ma zu mane bo metyi.’ Nde Moïse a nga ke tôbane Pharaon. Pharaon a nga yen ane Aaron a bibi Nil a ntume wé, ane mendim ya Nil me nga mane bo ve metyi metyi. Ôsôé ô taté ñhe na wo nyum, bekos be nga wu, teke fe mendime ya nyu e si y’Égypte. Ve Pharaon a nga ke ôsu a bene jô’é na bone b’Israël be ke.

 Éyoñe melu zangbwal me lôteya, Yéhôva a nga beta lôme Moïse ba Aaron be ke kate Pharaon na: ‘Nge wo ke ôsu a kamane bôte bam na be ke, minkongo mia zu jaé si y’Égypte.’ Nde Aaron a nga bete ntume wé e yôp, ane minkongo mi nga mane jaé e si y’Égypte. Minkongo mite mi nga nyiine bôte menda, e binoñ, a e bisua. Minkongo mi mbe vôm ase! Nde Pharaon a nga jô Moïse na, a ye’elane Yéhôva na a vaa ébubua éte. Pharaon a nga ka’a na a zu jô’é b’Israélite be ke. Nde Yéhôva a nga telé ébubua éte. B’Égyptien be taté ñhe na ba kôan mimbim minkongo, be bo’o mevis. Ane si y’Égypte é nga taté na ja nyum abé. Ve Pharaon a nji tyendé, a nga ke ôsu a bene jô’é na bone b’Israël be ke.

Nde Yéhôva a nga beta jô Moïse na: ‘Aaron a bibi’i mbuluk a ntume wé, éyoñ éte mbuluk wo ye veñesane binyônyoñ.’ Nde binyônyoñe bi nga mane yandane si ése été été. Nde bebo bisaé be Pharaon béziñ be nga jô nye na: ‘Ébubua ji ja so be Zambe.’ Ve Pharaon a nga ke éngana’a jé ôsu, a nga bene jô’é na bone b’Israël be ke.