D Israelite sind immer no Sklave und müend hert schaffe. Jehova schickt dur de Moses und de Aaron em Pharao e Nachricht: «Laa mis Volk i d Wildnis gah, dass si mich dört chönnd abete.» De stolz Pharao seit: «Mir isch gliich, was Jehova seit. D Israelite bliibed da.» Er zwingt si ab jetzt, no herter z schaffe. Drum zeigt Jehova em Pharao, dass er vil stärcher isch. Hesch du en Idee, wie? Er macht 10 Plage z Ägypte. Jehova seit zum Moses: «De Pharao lost nid uf mich. Morn am Morge isch er am Nil. Gang denn zu ihm und säg ihm, dass alles Wasser im Nil i Bluet verwandlet wird, wil er mis Volk nid laat la gah.» De Moses macht, was Jehova seit. De Pharao luegt zue, wie de Aaron mit sim Stab uf de Nil schlaat und denn verwandlet sich alles Wasser i Bluet. De Fluss fangt a stinke. D Fisch sterbed und s Wasser vom Nil cha mer nüm trinke. Aber de Pharao laat d Israelite trotzdem nid la gah.

Sibe Täg später schickt Jehova de Moses wider mitere Nachricht zum Pharao: «Wenn mis Volk nid dörf gah, wirds in Ägypte plötzlich ganz vil Frösch gee.» De Pharao laat aber d Israelite immer no nid la gah. Da streckt de Aaron sin Stab i d Luft und im ganze Land chömmed Frösch füre. Si sind i de Hüüser, i de Bett, sogar i de Schüssle, eifach überall! De Pharao wett vom Moses, dass er Jehova bittet, dass di Plag ufhört. Und er verspricht em Moses sogar, dass d Israelite chönnd gah. Drum stoppt Jehova d Plag. D Ägypter sammled di tote Frösch ii und tüend si uf Hüüfe. Im ganze Land fangts a stinke. Aber de Pharao wett d Israelite doch nid la gah.

Drum seit Jehova zum Moses: «De Aaron söll mit sim Stab uf de Bode haue und us em Staub werded denn Stächmugge.» Sofort sind überall ganz vil Stächmugge. Di einte Lüt vom Pharao säged: «Die Plag chunnt vo Gott.» Aber de Pharao wett d Israelite immer no nid la gah.