Achepchieeshii na israeliitakana natuma na egipciokana otta naʼyateʼerüin maʼin naya. Aluwataanüshi Moisés nümaa Aarón nutuma Jeʼwaa nünainmüin faraón süpüla müinjatüin nünüiki: «Püjüta tapueulose isashiipaʼamüin süpüla naʼwaajüinjachin taya». Yaletüsü maʼin naaʼin faraón sümaa nümüin: «Nnojotsü jamajatüin tamüin nünüiki Jeʼwaa. Nnojoishii tajütüinjanain na israeliitakana». Süchikijee tia, kooʼomüinsü maʼin naʼyataain na israeliitakana nutuma faraón. Sünainjee tia, nüntiraka Jeʼwaa wanee kasa namüin na egipciokana. ¿Kasa nüntiraka namüin? Nüntirüin poloosü kasa mojusü. «Macheʼesai tamüin faraón. Cheechi nia wattaʼa, wattaʼa maalü sotpaʼa tü süchikat Nilo. Püküja nümüin ishajaainjatüin tü süchikat süka nnojoluin nüjüteein tapueulose», nümakalaka Jeʼwaa nümüin Moisés. Jaa müshi Moisés, nuʼunaka eemüin faraón. Niʼraka faraón nücholetirüin Aarón tü waraaratkat, ishajaaka tü wüinkat. Ayatüshia faraón nnojolin nüjüteein na israeliitakana.

Akaratshi kaʼi süchikijee tia, nuluwataanaka Moisés nüchikuaʼa nutuma Jeʼwaa sünain eʼikajawaa nünüiki nümüin faraón: «Nnojorüle püjütüin  tapueulose, epirajaweerü eperüʼüi tü mmakat Egipto». Shiasaʼa süka nnojoluin jaa nümüin faraón, niyaleraka Aarón tü waraaratkat otta shipirajaaka eperüʼüi tü mmakat Egipto. Eejatü eperüʼüi nepialuʼu na wayuukana, saaʼu natunkule otta suluʼu neitain. ¡Pasanainshii neʼe naya sünain tü eperüʼüikat! «Puchunta nümüin Jeʼwaa nüshawaleʼerai toulia tü eperüʼüikat. Tajüteenaka na israeliitakana», nümaka faraón nümüin Moisés. Nüshawaleʼeraka shia Jeʼwaa. Wainma maʼin tü eperüʼüi outusü neichajaka na egipciokana. Jawaikalaka maʼin tü mmapaʼakat, ayatapejeʼe naʼalijirüin faraón na israeliitakana.

Nümaka Jeʼwaa nümüin Moisés: «Anasü nütaʼitüle Aarón tü mmakat süka tü waraaratkat. Naainjapa tia, eeʼiranajaweerü shipein tü sümamülakat mma». Ayatakaʼaya shia, müliasü maʼin naaʼin na egipciokana shikajüin shipe. Eeshii waneinnua egipcio makana nümüin faraón: «¡Nia antiraka Maleiwa tü shipekat!». Mayaapejeʼe sülatüin tia, nnojoishii nüjütüin faraón na israeliitakana.