Umi israelita haʼe vaʼekue esklávo Egíptope. Umi egipcio ojopy hendivekuéra ha omombaʼapo pohýi chupekuéra. Jehová omondo Moisés ha Aarónpe heʼi hag̃ua Faraónpe: “Epoi che puévlogui oho hag̃ua cheadora pe desiértope”. Faraón ojekreeterei ha heʼi chupekuéra: “Mbaʼeveténgo chéve la Jehová heʼíva. Che ndahejamoʼãi chupekuéra oho”. Upéi Faraón omombaʼapo pohyivéntema umi israelítape. ¿Mbaʼépa ojapo Jehová? Haʼe odesidi omondotaha 10 kastígo Egíptope. Jehová heʼi Moiséspe: “Faraón nopenái cherehe. Koʼẽrõ pyhareve retopáta hese rrío Nílope. Eho ere chupe pe ýgui oikotaha tuguy ndohejái rupi che puévlope oho”. Moisés ojapo la Jehová heʼíva chupe ha oho Faraón rendápe. Faraón ohecha Aarón oinupãha pe y ivastónpe ha pe ýgui oiko tuguy. Upéi pe rrío oñepyrũma ine ha ndaikatuvéi ni ojeiʼu chugui ha umi pirakuéra omanomba. Upéicharõ jepe Faraón heʼi ndohejamoʼãiha umi israelítape oho pe desiértope.

Siete día haguépe Jehová omondo jey Moiséspe heʼi hag̃ua Faraónpe: “Neremondóiramo che puévlope, amyenyhẽta Egipto juʼígui”. Faraón  nopenái jeýma hesekuéra, upévare Aarón ohupi ivastón ha pe país kompletoite henyhẽte juʼígui. Umi juʼi oĩ vaʼekue opárupi, umi hénte rógape, hupapekuéra, ha iplátope entéro. Faraón heʼi Moiséspe: “Perrogamína Jehovápe tojukapa umi juʼi. Upéi apoíta umi israelítagui”. Upémarõ Jehová ojukapaite umi juʼípe ha umi egipcio oñepyrũ ombyaty atyraite umi heʼongue ha pe país kompletoite ojagarrapa la mbaʼe ne. Upéicharõ jepe, Faraón ndopoíri jey umi israelítagui.

Upéi Jehová heʼi Moiséspe: “Ere Aarónpe ojagarra hag̃ua ivastón ha oinupã hag̃ua pe yvy, ha pe yvytimbo opuʼãvagui oikóta mbarigui”. Ha upeichaite oiko, umi mbarigui ojagarrapaite Egipto ha ojopipaite umi héntepe. Algúno egipcio heʼi Faraónpe: “Ko kastígo añetehápe ou Ñandejáragui”. Upéicharõ jepe, Faraón ndopoíri jey umi israelítagui.