Orang Israel dipejal bebendar agi gawa nyadi ulun. Jehovah nganjung Moses enggau Aron ngagai Raja menua Ejip mai pesan tu: ‘Lepaska nembiak Aku ngambika sida ulih nyembah Aku di menua puang.’ Raja nyaut enggau sumbung: ‘Aku enda pedulika nama utai ku Jehovah, lalu aku enggai ngelepaska orang Israel.’ Raja lalu mejal orang Israel gawa enggau bebendar agi. Jehovah deka ngukum Raja nya. Nemu nuan baka ni? Iya mai Sepuluh Tulah ninggang menua Ejip. Jehovah madah ngagai Moses: ‘Raja menua Ejip enggai mendingka Aku. Pagila, iya deka nurun ngagai Sungai Nile. Seduai patut betemu enggau iya lalu madah ngagai iya, ketegal iya enggai ngelepaska nembiak Aku, ai ba Sungai Nile deka bebali nyadi darah.’ Moses nangika Jehovah lalu betemu enggau Raja. Raja nya meda lebuh Aron malu ai Sungai Nile ngena tungkat lalu sungai nya bebali nyadi darah. Sungai nya berengkah bebau but, semua ikan mati lalu nadai ai ke ulih diirup ari Sungai Nile nya. Tang, Raja agi enggai ngelepaska orang Israel.

 Pengudah tujuh hari, Jehovah nganjung Moses betemu baru enggau Raja mai pesan tu: ‘Enti nuan enggai ngelepaska nembiak Aku, menua Ejip deka penuh enggau engkatak.’ Aron ngangkatka tungkat iya lalu engkatak ngemenuhka menua nya. Rayat ba menua nya tetemuka engkatak ba rumah sida, katil enggau ba dalam mangkuk. Engkatak bisi ba sebarang endur! Raja ngasuh Moses minta Jehovah ngetuka tulah nya. Raja besemaya deka ngelepaska orang Israel. Nya alai, Jehovah ngetuka tulah nya lalu orang Ejip nugungka bangkai engkatak. Menua nya nyau bebau but. Tang, sekali agi Raja enggai ngelepaska orang Israel

Udah nya, Jehovah madah ngagai Moses: ‘Asuh Aron malu tanah ngena tungkat iya, ngambika di serata menua Ejip amau deka bebali nyadi kerengit, tauka lalat mit ti ngigit.’ Tekala nya, kerengit bisi ba sebarang endur. Sekeda ari rayat menua Ejip madah ngagai Raja: ‘Tulah tu ari Petara.’ Tang, Raja enggai ngelepaska orang Israel.