Ebʼ laj Israel wankebʼ chaq choʼq moos, ut ebʼ laj Egipcio keʼminoʼk rehebʼ chi kʼanjelak chi kaw. Li Jehobʼa kixtaqla laj Moises ut laj Aaron chi xkʼebʼal li esil aʼin re laj Faraon: «Kanabʼ chi xik lintenamit re naq tixloqʼoni wu saʼ li chaqichʼochʼ». Laj Faraon jwal qʼetqʼet aj winq ut kixye: «Maakʼaʼ nawaj re kʼaru tixye li Jehobʼa. Inkʼaʼ tinkanabʼebʼ chi xik ebʼ laj Israel». Chirix chik aʼan, laj Faraon kixminebʼ ru chi kʼanjelak jwal kaw wiʼ chik. Abʼan li Jehobʼa tqʼusuq re. Kʼaru kixbʼaanu? Kixtaqla lajeebʼ li rahilal saʼ Egipto. Li Jehobʼa kixye re laj Moises: «Laj Faraon inkʼaʼ naʼabʼink chiwu. Eqʼla taataw saʼ li nimaʼ Nilo. Ayu ut ye re, naq li nimaʼ tsutqʼiiq choʼq kikʼ xbʼaan naq inkʼaʼ naxkanabʼ chi xik lintenamit». Laj Moises kiʼabʼink ut xkoho rilbʼal laj Faraon. Laj Faraon kiril naq laj Aaron kixtochʼ li nimaʼ Nilo rikʼin li xxuqʼ, ut li haʼ kisutqʼiik choʼq kikʼ. Li nimaʼ kiʼok chi chuhoʼk, maaʼani chik kiruhank rukʼbʼal li haʼ, ut ebʼ li kar keʼkamk. Abʼan laj Faraon toj inkʼaʼ naraj xkanabʼankilebʼ chi xik saʼ chaqichʼochʼ.

 Naq kinumeʼk wuqubʼ kutan, li Jehobʼa kixtaqla wiʼ chik laj Moises chi xkʼebʼal jun li esil re laj Faraon: «Wi inkʼaʼ nakaakanabʼ chi xik lintenamit, chixjunil Egipto tnujaq chi amoch». Saʼ xkʼabʼaʼ naq laj Faraon inkʼaʼ kiʼabʼink, laj Aaron kixtaqsi li xxuqʼ, ut chixjunil li tenamit kinujak chi amoch. Keʼok saʼebʼ li rochoch li poyanam, wankebʼ chiruhebʼ li xchʼaat, saʼebʼ li xsekʼ... Yalaq bʼar wankebʼ! Laj Faraon kixye re laj Moises: «Ye re li Jehobʼa naq tixxaqabʼ li rahilal. Tojaʼ naq, tinkanabʼ chi xik ebʼ laj Israel». Joʼkan naq, li Jehobʼa kixxaqabʼ li rahilal, ut ebʼ laj Egipcio keʼxchʼutubʼ chixjunil li amoch li keʼkamk. Li naʼaj kiʼok chi chuhoʼk, abʼan laj Faraon inkʼaʼ kixkanabʼ wiʼ chik chi xik li tenamit.

Chirix chik aʼan, li Jehobʼa kixye re laj Moises: «Laj Aaron tixsakʼ li chʼochʼ rikʼin li xxuqʼ. Naq tixbʼaanu, li poqs tsutqʼiiq choʼq suq». Ut joʼkan kikʼulmank, yalaq bʼar kisutunk ebʼ li suq ut keʼok xkʼuxbʼal ebʼ li poyanam. Wankebʼ laj Egipcio keʼxye re laj Faraon: «Li rahilal aʼin nachalk rikʼin li Yos!». Usta joʼkan, laj Faraon inkʼaʼ kixkanabʼebʼ chi xik laj Israel.