Aisiraeli maarutithagio wĩra mũritũ marĩ ngombo. Nĩ ũndũ ũcio, Jehova nĩ aatũmire Musa na Haruni makeere Firauni ũũ: ‘Rekereria andũ akwa mathiĩ nĩguo makandutĩre igongona werũ-inĩ.’ Firauni aacokirie ũũ arĩ na mwĩtĩo: ‘Ndiramakio nĩ ũrĩa Jehova oigĩte na ndikũrekereria Aisiraeli mathiĩ!’ Nĩ ũndũ ũcio Firauni nĩ aamarutithirie wĩra o na makĩria. Nĩ harĩ ũndũ Jehova eendaga kũruta Firauni. Hihi nĩ ũĩ ũrĩa eekire? Aareheire Amisiri Mahũra Ikũmi. Jehova eerire Musa ũũ: ‘Firauni ndarenda gũũthikĩrĩria. Rũciũ rũcinĩ agaakorũo Rũũĩ-inĩ rwa Nailo. Nĩ ũgathiĩ ũmwĩre atĩ tondũ nĩ aregete kũrekereria andũ akwa, maaĩ mothe ma Rũũĩ rwa Nailo nĩ megũtuĩka thakame.’ Musa nĩ aathĩkire na agĩthiĩ kũrĩ Firauni. Firauni aarĩ ho rĩrĩa Haruni aaringire Rũũĩ rwa Nailo na rũthanju na maaĩ magĩtuĩka thakame. Maaĩ maambĩrĩirie kũnunga, thamaki igĩkua, na maaĩ mothe ma Nailo matiarĩ matheru ma kũnyua. O na kũrĩ ũguo, Firauni ndaarekire Aisiraeli mathiĩ.

 Thutha wa thikũ mũgwanja, Jehova nĩ aatũmire Musa rĩngĩ kũrĩ Firauni nĩguo akamwĩre: ‘Angĩkorũo ndũkũrekereria andũ akwa mathiĩ, gũkũiyũra ciũra Misiri guothe.’ Haruni oire rũthanju rwake na igũrũ, nacio ciũra ikĩambĩrĩria kũiyũra kũndũ guothe. Andũ maakorire ciũra thĩinĩ wa nyũmba ciao, marĩrĩ-inĩ mao, o hamwe na indo-inĩ cia riiko. Ciũra icio ciaiyũire kũndũ guothe! Firauni nĩ eerire Musa athaithe Jehova aniine ciũra icio na akĩmwĩra atĩ nĩ egwĩtĩkĩria Aisiraeli mathiĩ. Nĩ ũndũ ũcio Jehova akĩrũgamia ihũra rĩu, nao Amisiri magĩcokanĩrĩria ciũra icio hamwe. Bũrũri wothe waambĩrĩirie kũnunga. Ĩndĩ o na hĩndĩ ĩyo, Firauni ndetĩkĩririe andũ mathiĩ.

Jehova aacokire akĩra Musa ũũ: ‘No mũhaka Haruni aringe thĩ na rũthanju rwake nĩguo rũkũngũ rũtuĩke rwagĩ.’ O hĩndĩ ĩyo gũkĩiyũra rwagĩ kũndũ guothe. Andũ amwe a Misiri meerire Firauni ũũ: ‘Ihũra rĩrĩ riumĩte kũrĩ Ngai.’ O na kũrĩ ũguo, Firauni ndaarekire Aisiraeli mathiĩ.