Dɛn bin fos di Izrɛlayt dɛn fɔ wok tranga wan as slev dɛn. Jiova bin sɛn Mozis ɛn Erɔn fɔ go gi Fɛro dis mɛsej we se: ‘Lɛf mi pipul dɛn mek dɛn go, so dat dɛn go wɔship mi na di wildanɛs.’ Fɛro ansa dɛn prawd wan se: ‘A nɔ want fɔ no wetin Jiova se, ɛn a nɔ go gri mek di Izrɛlayt dɛn go.’ Dɔn Fɛro bin fos dɛn fɔ wok tranga wan pas aw dɛn bin de wok. Jiova go tich Fɛro lɛsin. Yu sabi aw i go du dat? I bin mek tɛn bad bad tin dɛn apin na Ijipt. Jiova bin tɛl Mozis se: ‘Fɛro nɔ de lisin to mi. Na mɔnin, i gɛt fɔ go na Riva Nayl. Go mit am ɛn tɛl am se bikɔs i nɔ gri fɔ mek mi pipul dɛn go, ɔl di wata na riva Nayl go tɔn to blɔd.’ Mozis bin obe ɛn go to Fɛro. Fɛro wach we Erɔn bin nak di wata wit in stik ɛn di wata bin tɔn to blɔd. Di wata bin bigin fɔ smɛl, di fish dɛn bin day, ɛn no klin wata nɔ bin de fɔ drink na di riva Nayl. Fɛro stil nɔ bin gri fɔ mek di Izrɛlayt dɛn go.

 Sɛvin dez afta dat, Jiova bin sɛn Mozis bak fɔ go tɛl Fɛro dis mɛsej we se: ‘If yu nɔ lɛf mi pipul dɛn mek dɛn go, frɔg dɛn go ful-ɔp ɔlsay na Ijipt.’ Erɔn es in stik ɔp, ɛn frɔg dɛn ful-ɔp di land. Di pipul dɛn bin de si frɔg dɛn na dɛn os dɛn, na dɛn bed dɛn, ɛn na dɛn bol dɛn. Frɔg dɛn bin de ɔlsay! Fɛro bin tɛl Mozis fɔ beg Jiova fɔ mek i stɔp dis bad tin. Fɛro bin prɔmis se i go gri mek di Izrɛlayt dɛn go. So Jiova bin stɔp dis bad tin, ɛn di Ijipshian dɛn pak pak di day frɔg dɛn bay ip. Di land bigin fɔ smɛl. Bɔt stil, Fɛro nɔ bin gri fɔ mek di pipul dɛn go.

Dɔn Jiova bin tɛl Mozis se: ‘Mek lɛ Erɔn nak di grɔn wit in stik, ɛn di dɔti go tɔn to smɔl smɔl flay dɛn we de bɛt.’ Wantɛm wantɛm, di smɔl smɔl flay dɛn bin de ɔlsay na di land. Sɔm pan Fɛro in yon pipul dɛn bin tɛl am se: ‘Dɛn bad bad tin dɛn ya kɔmɔt frɔm Gɔd.’ Bɔt stil, Fɛro nɔ bin gri fɔ mek di Izrɛlayt dɛn go.