တၢ်မၤလိ ၁၉
တၢ်နးတၢ်ဖှီၣ်အဆိကတၢၢ်သၢခါ
ပှၤအံၣ်စရ့လးဖိတဖၣ်န့ၣ် တၢ်မၢအီၣ်အဝဲသ့ၣ်ဒ် ကုၢ်အသိးလီၤ. ယဟိဝၤယွၤဆှၢလီၤ စီၤမိၤၡ့ဒီးစီၤအၤဟရိၣ်လၢ ကတဲဘၣ်ဝဲစီၤပၤဖၤရိၤလၢ– ‘ပျၢ်လီၤကွံာ်ယပှၤဂီၢ်မုၢ် ဒ်သိးကလဲၤဘူၣ်ထီၣ်ဘါထီၣ်ယၤလၢ ပှၢ်လၢ်ကျါတက့ၢ်.’ စီၤပၤဖၤရိၤပာ်ထီၣ်ထီအသး ဒီးတဲဝဲလၢ– ‘ယတကနၣ်ဃုာ်တၢ်လၢ ယဟိဝၤယွၤတဲဝဲဘၣ်. ဒီးယတပျဲလဲၤပှၤအံၣ်စရ့လးဖိစ့ၢ်ကီးဘၣ်.’ ဝံၤဒီး စီၤပၤဖၤရိၤမၢပှၤအံၣ်စရ့လးဖိတဖၣ် မၤတၢ်ဆူၣ်န့ၢ်ဒံးအလီၢ်လီၤ. လၢတၢ်န့ၣ်အဃိ ယဟိဝၤယွၤကသိၣ်ဃီၣ်စီၤပၤဖၤရိၤလီၤ. ကစၢ်ယွၤသိၣ်ဃီၣ်အီၤဒ်လဲၣ်န့ၣ် မ့ၢ်နသ့ၣ်ညါဧါ. ကစၢ်ယွၤဒုးလီၤဝဲတၢ်နးတၢ်ဖှီၣ်အခါ ၁၀ လၢကီၢ်အဲၤကူပတူးအပူၤလီၤ. ယဟိဝၤယွၤတဲဘၣ်စီၤမိၤၡ့လၢ– ‘စီၤပၤဖၤရိၤတဒိကနၣ်ယကလုၢ်ဘၣ်. ခဲမုၢ်ဆ့ၣ်ဂီၤခီန့ၣ် စီၤပၤဖၤရိၤကလဲၤလၢ ထံကျိနံၤလါအကပၤလီၤ. လဲၤဆူအအိၣ်ဒီးတဲဘၣ်အီၤလၢ မ့ၢ်လၢနတပျဲလဲၤယပှၤဂီၢ်မုၢ်အဃိ ထံလၢအိၣ်လၢထံကျိနံၤလါအပူၤအံၤ ကကဲထီၣ်တၢ်သွံၣ်ခဲလၢာ်လီၤ.’ စီၤမိၤၡ့ဒိကနၣ်ကစၢ်ယွၤ အကလုၢ် ဒီးလဲၤဝဲဆူစီၤပၤဖၤရိၤအအိၣ်လီၤ. ဒီးဖဲစီၤအၤဟရိၣ်တီၢ်ဝဲ ထံကျိနံၤလါလၢအနီၣ်ထိးဘိအခါ စီၤပၤဖၤရိၤထံၣ်ဘၣ်ဝဲလၢ ထံကဲထီၣ်တၢ်သွံၣ်လီၤ. ဒီးထံကျိအထံနၢအုၣ်ဝဲ, ညၣ်တဖၣ်လၢအိၣ်လၢ ထံကျိပူၤန့ၣ်သံဝဲ ဒီးပှၤအီထံလၢထံကျိအံၤအပူၤ တသ့လၢၤဘၣ်. ဘၣ်ဆၣ် စီၤပၤဖၤရိၤတပျဲလဲၤပှၤအံၣ်စရ့လးဖိတဖၣ်လၢ ကလဲၤဘူၣ်ထီၣ်ဘါထီၣ် ယဟိဝၤယွၤဒံးဘၣ်.
ပူၤကွံာ်နွံသီဝံၤအလီၢ်ခံ ယဟိဝၤယွၤဆှၢလီၤက့ၤစီၤမိၤၡ့ဆူ စီၤပၤဖၤရိၤအအိၣ်ဒီး တဲဘၣ်အီၤလၢ– ‘နမ့ၢ်တပျဲလဲၤယပှၤဂီၢ်မုၢ်န့ၣ် ဒ့ၣ်ကအိၣ်ထီၣ်ဝဲလၢကီၢ်အဲၤကူပတူးအပူၤဝးဝးလီၤ.’ ဒီးစီၤအၤဟရိၣ်ယူာ်ထီၣ်အနီၣ်ထိးဘိ ဒီးဒ့ၣ်တဖၣ်အိၣ်ထီၣ်ဝဲလၢ ထံကီၢ်ဒီတဘ့ၣ်အပူၤလီၤ. ဒ့ၣ်တဖၣ်အိၣ်ဝဲလၢ ပှၤအဲၤကူပတူးဖိအဟံၣ်ပူၤ, လၢအလီၢ်မံခိၣ် ဒီးလၢအလီခီပူၤလီၤ. ဒ့ၣ်တဖၣ်အိၣ်လၢ တၢ်လီၢ်ကိးပူၤဒဲးလီၤ. ဒီးစီၤပၤဖၤရိၤမၢ စီၤမိၤၡ့ဃ့ကညး ယဟိဝၤယွၤဒ်သိး ကမၤလီၤမၢ်ကွံာ်ဒ့ၣ်တဖၣ်အံၤအဂီၢ်လီၤ. စီၤပၤဖၤရိၤအၢၣ်လီၤဝဲလၢ ကပျဲလဲၤပှၤအံၣ်စရ့လးဖိလၢ ကလဲၤဘူၣ်ထီၣ်ဘါထီၣ် ကစၢ်ယွၤလီၤ. အဃိ ယဟိဝၤယွၤ မၤပတုာ်ဝဲတၢ်နးတၢ်ဖှီၣ်အံၤလီၤ. ဒ့ၣ်တဖၣ်သံကွံာ်ဝဲဒီး ပှၤပာ်ဖှိၣ်ထီၣ်ဒ့ၣ်တဖၣ်အံၤန့ၢ်ဝဲ တပူၣ်ဘၣ်တပူၣ်လီၤ. ဒီးကီၢ်အဲၤကူပတူးနၢအုၣ်ဝဲဒီကီၢ်ညါ. ဘၣ်ဆၣ် စီၤပၤဖၤရိၤဆီတလဲအသးဒီး တပျဲလဲၤပှၤအံၣ်စရ့လးဖိဒံးဘၣ်.
ဝံၤဒီး ယဟိဝၤယွၤတဲဘၣ်စီၤမိၤၡ့လၢ– ‘မၢစီၤအၤဟရိၣ် တီၢ်လီၤဟီၣ်ခိၣ်လၢ အနီၣ်ထိးဘိ ဒီးဟီၣ်ခိၣ်ကမူၣ်ကဲထီၣ်လၢ ဃးသူလီၤ.’ ဖဲစီၤအၤဟရိၣ်တီၢ်ဝဲဟီၣ်ခိၣ်ဝံၤအလီၢ်ခံ တၢ်ဖိဃၢ်အိၣ်ထီၣ်ဝဲလၢ တၢ်လီၢ်ကိးပူၤဒဲးလီၤ. စီၤပၤဖၤရိၤအခ့အပှၤတနီၤ တဲဘၣ်အီၤလၢ– ‘တၢ်နးတၢ်ဖှီၣ်အံၤ ဟဲလၢကစၢ်ယွၤအအိၣ်လီၤ.’ ဘၣ်ဆၣ်သနာ်က့ စီၤပၤဖၤရိၤတပျဲလဲၤ ပှၤအံၣ်စရ့လးဖိဒံးဘၣ်.
“ယကဘိးဘၣ်သ့ၣ်ညါအီၤ လၢယစု, ဒီးယစိယကမီၤ, ဒီးကသ့ၣ်ညါဝဲလၢ ယမံၤမ့ၢ် [ယဟိဝၤ] ယွၤလီၤ.”—ယံးရမံယၤ ၁၆:၂၁
