Vaisraeli kwa va sininikire va rugane ngwendi vapika. Jehova kwa tumine Mosesa naArona kwaFarawo va ka mu tantere asi: ‘Siga vantu vange va ze va ka karere nge momburundu.’ Farawo kwa limbwilire nondino asi: ‘Kapi nani yi rugana eyi ana uyunga Jehova, ntani kapi ngani pulisira Vaisraeli va ze.’ Makura ta pe Vaisraeli yirugana yoyinzi. Jehova yipo ga tokwere kutengeka Farawo. Ono diva asi ngapi ga mu tengekere? Age kwa retere Mahepeko Murongo moEgipite. Jehova ta tantere Mosesa asi: ‘Farawo kapi ana kulimburukwa nge. Mungura, ngurangura nga za komukuro gwaNili. Ngo ze o ka mu tantere asi: “Morwa ono nyoka kusiga Vaisraeli va ze, mema gomomukuro gwaNili ngaga litjindja ga kare honde.”’ Mosesa ga limburukwire, makura ta ka gwanekera naFarawo. Farawo age kuna kutara, Arona ta toona mpango pomema makura ta ga litjindji ga kare honde. Nomfi ta di fu, mema gomomukuro gwaNili ta ga tameke kunuka ntani vantu kapi va vhulire kuganwa. Nye simpe Farawo ta nyoka kusiga Vaisraeli va ze.

 Konyima zomazuva ntambali, Jehova ta tumu hena Mosesa kwaFarawo aka mu tantere asi: ‘Nsene kapi no siga Vaisraeli va ze, Egipite ngazi zura mankowowo.’ Arona ta zerura mpango zendi, makura mankowowo ta ga zura sirongo nasinye. Ago kwa zulire momambo noponombete ntani pomarupasa. Ago kwa kere nakunye. Farawo ta pura Mosesa a kanderere kwaJehova a guse po mankowowo. Makura ta tumbwidire asi nga siga Vaisraeli va ze. Jehova ta hagekesa po mankowowo, makura ta va pongaike mankowowo gokufa. Sirongo kwa nukire. Nye Farawo simpe kapi ga sigire Vaisraeli va ze.

Jehova ta tantere Mosesa asi: ‘Arona a toone mpango zendi pevhu, makura mbundu zi lisitunuke nomwe.’ Nomwe ta di lihanene mosirongo nasinye. Vakareli vamwe vaFarawo tava mu tantere asi: ‘Nomwe edi Karunga ana di retesa po.’ Nye simpe Farawo kapi ga sigire Vaisraeli va ze.