Jo-Israel ne oket gi tich matek ahinya nikech ne gin wasumbni. Jehova nooro Musa gi Harun ir Farao mondo ginyis Farao kama: ‘Yie mondo iwe joga, mondo gidhi gitina e thim.’ Farao nosungore kowacho niya: ‘Gik ma Jehova wachogo ok obadha, kendo ok abi yie ne Jo-Israel owuog kae.’ Kendo Farao nomedo sando Jo-Israel komiyogi tich matek moloyo. Jehova ne ong’ado ni ne odhi miyo Farao ong’e ni en ng’a. Be ing’eyo kaka ne odhi timo mano? Ne odhi kelo ne Jo-Misri Masiche Apar. Jehova nonyiso Musa niya: ‘Farao ok dwar winjo gima anyise. Kiny gokinyi obiro dhi e Aora Nail. Dhi irom kode kuno mondo inyise ni pige duto mag Aora Nail biro lokore remo nikech otamore gonyo joga.’ Musa nodhi ir Farao kaka Jehova nochike. Farao noneno gi wang’e ka Harun ochwado pi Aora Nail gi luth, mi pi aorano duto olokore remo. Pi nochako dung’ marach, rech ne otho, kendo pi aorano koro ne ok nyal modhi. To Farao pod notamore gonyo Jo-Israel.

Bang’ ndalo abiriyo, Jehova ne ooro Musa kendo ir Farao gi ote ma wacho niya: ‘Ka ok iyie ne joga mondo owuogi, to Misri duto biro  pong’ gi ogwende.’ Farao pod ne otamore winjo, omiyo Harun norieyo ludhe, kendo ogwende ne ochako pong’o piny Misri. Ogwendego ne yudore e i udi, e wi otendni, kod e bakunde mag chiemo. Kamoro amora nopong’ gi ogwende! Farao nokwayo Musa mondo osa Jehova ogol ogwendego, kosingo ni ne odhi weyo Jo-Israel owuogi. Omiyo, Jehova notieko masirano, kendo Jo-Misri nochoko ogwende mang’eny motho. Piny ne ng’ue marach. Kata kamano, Farao pod ne ok oyie ne Jo-Israel mondo owuogi.

Jehova noluwo ne Musa niya: ‘Harun onego ochwad piny gi ludhe, mondo buch lowo olokre gik ma chalo suna moko madongo ma kecho malit.’ Harun notimo kamano, kendo gik ma chalo suna moko madongo nopong’o pinyno duto. Nitie joma nonyiso Farao kama: ‘Mae en masira mowuok kuom Nyasaye.’ To Farao pod nodagi yie ne Jo-Israel owuogi.