RiIjipt ro rar iuun RiIsrael ro bwe ren jerbal ãinwõt rũkõm̦akoko ro aer. Innem Jeova ear jilkinl̦o̦k Moses im Aron ñan ippãn Pero bwe ren kwal̦o̦k ñane kõn naan kein an: ‘Kwõn kõtl̦o̦k armej ro aõ bwe ren etal ñan ãne jem̦aden im kabuñ ñan ña.’ Ak Pero ear kwal̦o̦k an utiej bũruon im ba: ‘Ijjab kea kõn ta eo Jeova ej ba, im iban kõtl̦o̦k bwe RiIsrael ro ren etal.’ Innem Pero ear kal̦apl̦o̦k an RiIsrael ro jerbal. Ak Jeova enaaj kar kajim̦we. Kwõjel̦ã ke ewi wãween an kar kõm̦m̦ane men in? Ear kõm̦m̦an bwe en wal̦o̦k Menin Kaeñtaan ko Joñoul ilo Ijipt. Jeova ear ba ñan Moses: ‘Pero em̦akoko in roñjake eõ. Ilju jibboñ, enaaj pãd ilo Reba Nile. Etal ñan ippãn im ba bwe kõn an m̦akoko in kõtl̦o̦k armej ro aõ, inaaj kõm̦m̦an bwe aolepen dãnnin Reba Nile en oktak ñan bõtõktõk.’ Moses ear pokake im ear etal ñan ippãn Pero. Pero ear reilo̦k im lo an Aron bõk jokon̦ eo an im deñõt ioon dãnnin reba eo kake, innem reba eo ear oktak ñan bõtõktõk. Kõn men in, reba eo ear jino ekkõõrõr, im ek ko ie rar mej, im ear ejjel̦o̦k limen armej ro. Ak Pero ear m̦akoko wõt im jab kõn̦aan kõtl̦o̦k an RiIsrael ro etal.

 Jimjuon raan tokãlik, Jeova ear bar jilkinl̦o̦k Moses ñan ippãn Pero bwe en kwal̦o̦k naan kein An: ‘El̦aññe kwõjjab kõtl̦o̦k armej ro aõ, inaaj koobrak Ijipt kõn frog ko.’ Innem ke Aron ear kotak jokon̦ eo an, ear jino obrak ãneo kõn frog. Armej ro rar lo an frog ko pãd ilowaan im̦õko im̦weer, jikin kiki ko aer, im ilowaan kõnno̦ ko aer. Aolep jikin ear obrak kõn frog! Innem Pero ear ba bwe Moses en akwel̦ap ñan Jeova bwe en kabõjrak menin kaeñtaan in, im ear kallim̦ur bwe enaaj kõtl̦o̦k RiIsrael ro. Kõn men in, Jeova ear kabõjrak an wal̦o̦k menin kaeñtaan in, im RiIjipt ro rar ainitok frog ko remej ñan elõñ ejouj ko. Innem ãneo ear jino ekkõõrõr. Ak ear bar oktak l̦õmn̦ak eo an Pero im ear dãpij wõt RiIsrael ro bwe ren jab etal.

Kõn men in, Jeova ear ba ñan Moses: ‘Kwõn jiroñ Aron bwe en deñõt lal̦ kõn jokon̦ eo an, im bũñalñalin lal̦ enaaj oktak ñan kij ko reddik rej ekkãke.’ Ke Aron ear kõm̦m̦ane men in, em̦õkaj an obrak ãneo kõn kij kein. Jet iaan armej ro an Pero rar ba ñane: ‘Anij ear kõm̦m̦an bwe en ãindein.’ Ak Pero ear m̦akoko wõt im jab kõn̦aan kõtl̦o̦k an RiIsrael ro etal.