VaIsaleli va va kakateyele ku panga cikuma mu ku pua vangamba. Ngeci Yehova ua tumine Mosesa na Alone kuli Falao na muzimbu ou ngueni: ‘Ecela vantu vange, linga va ka nji lemese ku vindinda.’ Na ku lihalesa ca kama Falao, ua kumbuluile ngueni: ‘Yehova ikeye iya, linga nji halakane lizi lieni, ka nji ka ecela vaIsaleli.’ Falao ua va kakateyele vaIsaleli ku panga cikumakuma. Ngeci Yehova ua hele Falao kasitiku. Ua tantekeya vati ua lingile? Ua lingile vipupu likumi mu Ingito. Yehova ua lekele Mosesa ngueni: ‘Falao kesi na ku nji halakana. Ku cimene, a ka kala ku ndonga ya Nilu, ya kuli ikeye na ku mu leka nguove muomu na viana ku ecela vantu vange, mema ose a mu Nilu a ka himpuka maninga.’ Mosesa uononokele, kaha ua ile kuli Falao. Falao ua muene Alone omo ua vetele mulamu, kaha ndonga ya himpukile maninga. Kaha mema a putukile ku nika, muomu vantsi va tsile, kaha ka kua kele naua mema a cili a ku nua mu Nilu. Vunoni kasi Falao ua vianene ku ecela vasaleli.

 Mu nima ya matangua 7, Yehova ua tumine Mosesa ku hilukila kuli Falao na muzimbu ou ngueni : ‘Nga ka ecela vantu vange, Ingito i ka sula na mandzunda.’ Kaha Alone ua kakuile mulamu, kaha ha mavu ha putukile ku lana mandzunda . Vantu va uanene mandzunda mu vindzivo viavo, ha mihela na ha malonga avo. Mandzunda va kele kuose! Falao ua tavele Mosesa linga a lambelele Yehova ku manusula eci cipupu caco. Muomu Falao ua kulahesele ngecize a ka ecela vaIsaleli. Ngeci Yehova uemikile cipupu caco, kaha vakua Ingito va kunguluile mandzunda mitumbo na mitumbo. Cifuti cose ca putukile ku nika. Vunoni Falao kasi ka tavele ku ecela vaIsaleli.

Kaha Yehova ua lekele Mosesa ngueni: ‘Alone a vete mulamu ueni ha mavu, kaha mpumputa i ka himpuka vena ni nguetu tusilu-silu.’ Kaha haze vene, tusilu-silu va kele kuose. Vamo vantu va Falao va mu lekele nguavo: ‘Eci cipupu ci na tundu kuli Njambi.’ Vutuhu ngoco, Falao kasi ka tavele ku ecela vaIsaleli.