Egiptoeuanij kinchiualtiyayaj israeleuanij chikauak ma tekitikaj. Jehová kintitlanki Moisés uan Aarón ma kiitatij faraón, uan ma kiiljuitij: “Xikinkauili notekipanojkauaj ma yakaj ipan uaktok tlali kampa nechueyichiuasej”. Uajka faraón kinnankilik: “Amo nijchiuas tlen Jehová kiijtoua, uan amo nikinkauas ma yakaj israeleuanij”. Teipa faraón kinchiualtik israeleuanij nojua tlauel chikauak ma tekitikaj. Yeka Jehová kitlalnamiktik faraón. ¿Tijmati tlake kichijki? Kintlatsakuiltik egiptoeuanij ika matlaktli tlamantli. Jehová kiiljuik Moisés: “Faraón amo kineki kichiuas tlen nikiljuik. Mostla ijnalok itstos ipan ueyatl Nilo. Xia uan xikiljui nopa atl mokuepas estli pampa amo kinkajtok notekipanojkauaj ma kisakaj”. Moisés kichijki tlen toTeotsij kiiljuik uan kiitato faraón. Faraón kiitak kema Aarón kitsouitejki nopa ueyatl ika ikuatopil, uan nopa atl mokuepki estli. Teipa, nopa atl pejki mijyotia uan amo aka ueliyaya kiiji, uan nochi michimej mijkej. Maske faraón kiitak tlen panotoya, nojua amo kinkauiliyaya israeleuanij ma kisakaj.

 Kema panok chikome tonali, Jehová sampa kititlanki Moisés ma kiitati faraón uan ma kiiljui: “Tlaj amo tikinkauilis notekipanojkauaj ma kisakaj, Egipto temis ika tamasolimej (o sapos)”. Nopa faraón amo kintlakakilik. Uajka Aarón kitlalanki ikuatopil, uan ipan nochi Egipto kiskej tlauel miakej tamasolimej. Nopa tamasolimej itstoyaj ipan ininchaj maseualmej, kampa kochiyayaj uan kampa tlakuayayaj, ¡kampa ueli itstoyaj! Uajka nopa faraón kiiljuik Moisés: “Xikiljui Jehová ma kinijkuini ni tamasolimej, uan na nikinkauilis israeleuanij ma kisakaj”. Uajka toTeotsij kichijki ma mikikaj nopa tamasolimej. Teipa nopa egiptoeuanij kinmontonojkej nochi tamasolimej tlen miktoyaj, uan kampa ueli tlapoteuiyaya. Uan faraón sampa amo kinkajki israeleuanij ma yakaj.

Teipa, Jehová kiiljuik Moisés: “Xikiljui Aarón ma kitsouiteki tlali ika ikuatopil. Uan nopa tlaltejpoktli mokuepas pilsayoltsitsij”. Kema Aarón kichijki, yolkej miakej pilsayoltsitsij uan kintsopiniyayaj o kinkuayayaj maseualmej. Maske sekij egiptoeuanij kiiljuijkej faraón: “¡Ni tlamantli san ininTeotsij ueli kichiua!”, faraón amo kinkajki israeleuanij ma yakaj.