VaIziraeri vakava vecivangirijwa kuti vashande ngo simba inga varanda. Jehovha wakatuma Mosi na Aroni ka Faro no masoko aya: ‘Siyai vandhu vangu vaende kondinamata mu zvipare.’ Asi Faro wakadavira kudari: ‘Andina basa no zvinonanga Jehovha, zve andizosii kuti vaIziraeri vapinde.’ Ngokudaro Faro wakavavangirija kuti vashande ngo simba. Jehovha wakasunga kujijisa Faro cijijo. Unoziva kuti wakaitisa kudini? Iyena wakaviisa gumi ro matambujiko mu Ejipita. Jehovha wakati kuna Mosi: ‘Faro aazivi kundipurukira. Co mangwanani, iyena anozova pa Murambo Niro. Endai naye zve mubvunjei kudari ngokuti auzivi kutendera kuti vandhu vangu vapinde, kumwa yese yo mu Niro inozocinja kuva ngazi.’ Mosi wakazwira zve wakaenda kuna Faro. Faro wakavona apo Aroni waitaka murambo wa Niro ngo ndonga yake zve kumwa yakacinja kuva ngazi. Kumwa yakatanga kunuha, hove jakafa zve akucaingepizve no kumwa yaushoni mu Niro kuti imwiwe. Faro aazivi kutendera kuti vaIziraeri vapinde.

 No papera njiku nomwe, Jehovha wakatumazve Mosi ka Faro no masoko aya: ‘Kudari ukatama kupindisa vandhu vangu, Ejipita inozozara ngo macehe.’ Aroni wakataka ndonga yake pasi zve macehe akatanga kufukija nyika yese. Vandhu vaiwana macehe mu nyumba javo, pa kama javo no mu mujiyo javo. Macehe ainga pari pese hapo! Faro wakakumbira Mosi abvunje Jehovha kuti apeje dambujiko iri. Faro wakagondesa kuti waizosia vaIziraeri vapinde. Ngokudaro Jehovha wakaimisa dambujiko zve vaEjipita vakaunganija macehe akafa, mututu no mututu. Nyika yakatanga kunuha. Asi, Faro aazivi kusiyazve kuti vaIziraeri vapinde.

Jehovha wakati kuna Mosi: ‘Aroni anodikana kutaka pasi zve bukuta rinozoita mutunga kana zvindhesi zvidoko zvinoruma.’ Ngo kukasika kwakava no mutunga pa ndau yese hayo. Vamweni vandhu va Faro kamare vakati kwaari: ‘Dambujiko iri rabva ka Mwari kamare.’ Asi Faro aazivi kutendera kuti vaIziraeri vapinde.